قازان كينوفەستيۆالىنىڭ ارنايى سىيلىعىنا «مۇقاعالي» فيلمى يە بولدى

بۇل تۋرالى ش. ايمانوۆ اتىنداعى «قازاقفيلم» ا ق- دان ءمالىم ەتتى، دەپ حابارلايدى قازاقپارات.

«بەلگىلى قازاقستاندىق رەجيسسەر بولات قالىمبەتوۆتىڭ «مۇقاعالي» فيلمى XVIII قازان حالىقارالىق مۇسىلمان كينوفەستيۆالىنىڭ نەگىزگى بايقاۋ باعدارلاماسىندا قازىلار القاسىنىڭ ارنايى سىيلىعىنا يە بولدى.

نەگىزگى بايقاۋ باعدارلاماسىنا قازاقستان، تۇركيا، ءۇندىستان، يران، بانگلادەش، رەسەي، ەگيپەت، شري- لانكادان 10 كارتينا، سونداي- اق كوپرودۋكتسيادا تۇسىرىلگەن ەكى تاسپا ۇسىنىلدى. بيىل الەمنىڭ 44 ەلىنەن بارلىعى 625 ءوتىنىم تىركەلدى» - دەلىنگەن كينوستۋديا مالىمەتىندە.

ق ر مادەنيەت جانە سپورت مينيسترلىگىنىڭ تاپسىرىسى بويىنشا شاكەن ايمانوۆ اتىنداعى «قازاقفيلم» كينوستۋدياسى تۇسىرگەن كينوتاسپا اتى اڭىزعا اينالعان قازاق اقىنى مۇقاعالي ماقاتايەۆتىڭ ءومىرىنىڭ سوڭعى جىلدارى تۋرالى باياندايدى.

ەسكە سالساق، «مۇقاعالي» فيلمىنىڭ الەمدىك پرەمەراسى «قاراڭعى تۇندەر» 25- تاللين كينوفەستيۆالىنىڭ اياسىندا ءوتتى. وندا قازاقستاندىق فيلم ەكۋمەنيكالىق قازىلار القاسىنىڭ سىيلىعىن الدى.

بيىلعى ناۋرىز ايىندا بيوگرافيالىق كارتينا كەرالاداعى (ءۇندىستان) 26- حالىقارالىق كينوفەستيۆالدىڭ «الەمدىك كينو» سەكتسياسىندا ۇسىنىلدى.

ال تامىز ايىنىڭ باسىندا قىرعىزستاندا وتكەن «قازاقستان كينوسىنىڭ كۇندەرى» اتالعان فيلممەن اشىلدى. 15-20-قىركۇيەك ارالىعىندا فيلم گاتچيندەگى 28- حالىقارالىق «ادەبيەت جانە كينو» كينوفەستيۆالىنە (رەسەي) قاتىسادى دەپ كۇتىلۋدە.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى