استاناداعى سيناگوگا جايلى نە بىلەمىز - فوتو
ايتا كەتەيىك، سيناگوگا (كونە گرەكشە: συναγωγή — جيىن) - ياھۋديلىكتىڭ عيباداتحاناسى. سيناگوگا تولىق مانىندەگى حرام ەمەس، وندا ساداقا بەرۋگە، قۇرباندىق شالۋعا رۇقسات ەتىلمەيدى. نەگىزىنەن ول قاۋىم بولىپ باس قوسىپ، عيبادات جاسايتىن، قوعام ماسەلەلەرىن شەشەتىن ءۇي بولىپ سانالادى. ونىڭ ءوز قازىناسى، مۇلكى بار. ەۆرەيلەر قاۋىمدارىن راۆۆيندەر باسقارادى. راۆۆيندى بەدەلى مەن بىلىمىنە قاراي قاۋىمنىڭ ءوزى سايلايدى. سيناگوگادا ياھۋديلىكتە ەرەكشە ماڭىزدى سانالاتىن «شما، يزراەل» (تىڭدا يزرايل) دۇعاسى وقىلادى. سيناگوگانىڭ يەرۋساليمگە قاراعان قابىرعاسىنا كونە وسيەتتەردە ايتىلاتىن كەمە بەينەسى ورناتىلىپ، وعان يلەنگەن بىلعارىعا قاۋىرسىنمەن جازىلعان تورا ماتىندەرى قويىلادى.
قازاقپارات 14-15-قىركۇيەكتە وتەتىن ءداستۇرلى جانە الەمدىك دىندەر ليدەرلەرىنىڭ VII سەزى قارساڭىندا اتالعان ءمىناجات ءۇيى تۋرالى فوتورەپورتاج ۇسىنادى.
ءبىزدى راۆۆيننىڭ قاقپاسىنان راۆۆيننىڭ حاتشىسى ينگريد يللەنزەيەر كۇتىپ الدى.
راۆۆيننىڭ ءوزى وتباسىمەن سىرتتا جۇرگەن بولىپ شىقتى. حاتشىنىڭ ايتۋىنشا، سيناگوگاعا ادامدار ەڭ كوپ جينالاتىن كۇن - جۇما. ءار جۇمانىڭ كەشىندە، كۇن باتقان كەزدە «شابات» باستالادى. جۇمانىڭ كەشىنەن باستالعان «شابات» سەنبى كۇنى كۇن ۇياسىنا قونعانعا دەيىن جالعاسادى.
«شابات» كۇنى سيناگوگادا راۆۆين باستاعان ءدىندار ادامدار قۇلشىلىعىن جاساپ، دۇعالارىن وقيدى. ەرلەر مەن ايەلدەردىڭ دۇعا وقيتىن زالى بولەك- بولەك جابدىقتالعان.
ءبىرىنشى قاباتتا ورنالاسقان ەرلەردىڭ قۇلشىلىق زالىندا ءپىشىنى ستاندارتتى ۇستەلدەن ەرەكشە شاعىن ۇستەلدەر ءبىرىنشى نازارعا ىلىگەدى.
زالدىڭ قابىرعاسىندا اينالا كىتاپ سورەلەرى جابدىقتالعان. ول سورەلەردەن ءدىني كىتاپتىڭ ءتۇر- ءتۇرىن تابۋعا بولادى.
عيماراتتىڭ قابىرعالارى كونە ءدىني سۋرەتتەرمەن، ريتۋالدىق نىشاندارمەن كومكەرىلگەن.
ايەلدەردىڭ قۇلشىلىق زالى ەكىنشى قاباتتا ورنالاسقان. بۇل زالدىڭ اۋماعى ەرلەردىڭ زالىنان الدەقايدا تار. ەكى زالدىڭ اراسىن كۇمبەز تۇرىندەگى بوس كەڭىستىك الىپ تۇر.
«سيناگوگاعا تۇرمىستاعى ايەلدەر ورامال تاعىپ كەلۋى مىندەتتى. ال تۇرمىس قۇرماعان قىزدارعا ونداي شەكتەۋ جوق»، - دەيدى ينگريد يللەنزەيەر.
عيماراتتا قۇلشىلىق زالىنان بولەك وتباسىلىق تۇنەمەلەر بار. «شابات» كەزىندە ەلەكتر جارىعىن پايدالانباۋ كەرەك. ال تاماقتى الدىن الا ازىرلەپ قويادى. ويتكەنى شابات كەزىندە تاماق ىستەۋگە دە بولمايدى. ءتىپتى كولىكپەن جۇرۋگە دە رۇقسات جوق. سيناگوگاعا كەلگەندەر ۇيىنە جاياۋ قايتادى نەمەسە سيناگوگادا تۇنەپ قالادى. تۇنەمەلەر سونداي ءدىندارلار ءۇشىن قاراستىرىلعان.
راۆۆيننىڭ وتباسى دا وسى سيناگوگادا ءومىر سۇرەدى. ينگريد يللەنزەيەر جەرتولەدەن ورىن تەپكەن اسحاناداعى فۋتبول ۇستەلىن راۆۆيننىڭ بالالارىنا تيەسىلى دەپ ءتۇسىندىردى. ال اسحانادان عيمارات قىزمەتىشىلەرىنەن بولەك «شابات» كەزىندە قۇلشىلىق ەتۋگە كەلگەندەر دە تاماقتانادى.
سيناگوگانىڭ شتاتتىندا بەس ادام بار.
«ولاردىڭ ءبارى ءدىندى قابىلداۋى مىندەتتى ەمەس»، - دەيدى راۆۆيننىڭ حاتشىسى.
نۇر-سۇلتان قالاسىندا سيناگوگاعا كەلىپ، تۇراقتى قۇلشىلىق جاسايتىن 60-تاي وتباسى بار.
