قىتاي كاسىپكەرلەرى باتىس قازاقستاننان كيىك ءمۇيىزىن وندىرەتىن زاۋىت اشپاق
باتىس قازاقستان وبلىسىنىڭ اكىمى عالي ەسقاليەۆ قىتاي كومپانيالارىمەن كەڭەس وتكىزدى. كەزدەسۋ بارىسىندا قىتايلىق كاسىپكەرلەر اقبوكەندەردى وسىرەتىن ورىن اشۋدى ۇسىندى دەپ حابارلادى ۆەدومستۆونىڭ باسپا ءسوز قىزمەتى.
شاراعا بەينەبايلانىس ارقىلى قىتايدان ينۆەستيسيالىق قور، فارماتسيەۆتيكالىق مادەنيەتتى زەرتتەۋ قاۋىمداستىعى، ۇلتتىق جابايى تابيعاتتى سايكەستەندىرۋ ورتالىعىنىڭ وكىلدەرى، جەرگىلىكتى سالا ماماندارى مەن قوعام بەلسەندىلەرى قاتىسقان.
كەزدەسۋ بارىسىندا قىتاي كومپانيالارى جەكە قاراجات ەسەبىنەن باتىس قازاقستان وبلىسىندا كيىك وسىرۋگە ارنالعان ورىن اشۋدى ۇسىندى. سول جەردەگى لابوراتوريادا كيىكتىڭ دەريۆات (ءمۇيىزىن) وڭدەۋ زاۋىتىن ورنالاستىرىپ، بىرىككەن مەكەمە اشۋ تۋرالى جوسپارلارىمەن ءبولىستى. ءوڭىر باسشىسى ماسەلەنى جان- جاقتى زەرتتەپ، بەرىلگەن ۇسىنىس قارالاتىنىن جەتكىزدى، - دەلىنگەن حابارلامادا.
سونىمەن قاتار، كەزدەسۋگە قاتىسۋشىلار كيىكتەردى قورعاي وتىرىپ، عىلىمي زەرتتەۋ جۇرگىزۋ ارقىلى اۋلاۋعا مۇمكىن بولاتىن مولشەرىن تالقىلادى. ءوز كەزەگىندە وبلىس اكىمى شۇعىل تۇردە كيىكتەردىڭ پوپۋلياتسياسىن رەتتەۋ بويىنشا تۇجىرىمداما ازىرلەۋدى تاپسىردى.
