قازاق ءتىلىن وقىتاتىن جوبالاردىڭ اۆتورلارى «احمەت بايتۇرسىن ۇلى» توسبەلگىسىمەن ماراپاتتالادى
مۇنداي ۇسىنىس ەنگەن ۇكىمەت قاۋلىسى اشىق تالقىلاۋعا شىعارىلدى، دەپ حابارلايدى قازاقپارات ءتىلشىسى.
«احمەت بايتۇرسىن ۇلى» توسبەلگىسىمەن گۋمانيتارلىق سالا وكىلدەرى، قازاق ءتىلىنىڭ مارتەبەسىن كوتەرۋدە شىعارماشىلىق بەلسەندىلىك تانىتقان تۇلعالار، قازاق ءتىلىن وقىتۋ بويىنشا IT جوبالاردىڭ اۆتورلارى بولىپ سانالاتىن بىلىكتى ماماندار، سونداي- اق گۋمانيتارلىق سالادا ىنتىماقتاستىقتى نىعايتۋعا جانە دامىتۋعا ەلەۋلى ۇلەس قوسقان شەتەل ازاماتتارى دا ماراپاتتالادى.
«احمەت بايتۇرسىن ۇلى» توسبەلگىسى شەڭبەر ءتارىزدى ديامەترى 34 م م بولاتىن جەزدەن دايىندالادى. توسبەلگىنىڭ الدىڭعى بەتىندە (اۆەرس) احمەت بايتۇرسىن ۇلى بەينەسى بولادى. ونىڭ سىرتىندا شەڭبەر جيەگىندە «احمەت بايتۇرسىن ۇلى» دەگەن شىعىڭقى جازبا بەدەرلەنگەن. جازۋدىڭ ەكى شەتىنە ۇلتتىق ويۋ- ورنەك سالىنعان. توسبەلگىنىڭ سىرت جاعىنىڭ (ريەۆەرس) ورتاسىندا «قازاقستان رەسپۋبليكاسى» جازۋى ورنالاسقان. جازۋدىڭ ۇستىڭگى جانە استىڭعى بولىگىنە ۇلتتىق ويۋ ورنالاستىرىلعان. توسبەلگى ەنى 26 م م، بيىكتىگى 22 م م تىكتورتبۇرىشتى قالىپقا بەكىتىلەدى»، - دەلىگەن قۇجاتتا.
ەسكە سالايىق، ۇلت ۇستازىنى مەرەيتويىنا وراي قازاقستان ۇلتتىق بانكى «احمەت بايتۇرسىن ۇلى 150 جىل» مونەتاسىن شىعارعان بولاتىن.
سونىمەن قاتار، «احاڭ ءجۇرىپ وتكەن جولمەن» ەكسپەديتسياسىنىڭ ناتيجەسىندە ازەربايجان عىلىمي- زەرتتەۋ ورتالىعىنىڭ مۇراعاتىنان احمەت بايتۇرسىن ۇلىنىڭ ۆيدەوسى تابىلدى.
