جاڭاارقادا جازۋشى اقسەلەۋ سەيدىمبەككە ەسكەرتكىش قويىلدى
بۇل تۋرالى ءوڭىر اكىمدىگىنىڭ باسپا ءسوز قىزمەتىنەن ءمالىم ەتتى، دەپ حابارلايدى قازاقپارات ءتىلشىسى.
بيىل اقسەلەۋ سەيدىمبەكتىڭ 80 جىلدىق مەرەيتويى. وسىعان وراي، بۇگىن جاڭاارقا اۋدانىندا ءبىرتۋار تۇلعانى ۇلىقتاۋعا ارنالعان ءبىرقاتار شارا ۇيىمداستىرىلىپ، وعان جازۋشىنىڭ تۋىستارى مەن ەلىمىزگە بەلگىلى زيالى قاۋىم وكىلدەرى قاتىستى.
«ەسكەرتكىشتى اشۋ ءراسىمىن وبلىس اكىمى بەرىك ءابدىعالي ۇلى، اقسەلەۋ سەيدىمبەكتىڭ باۋىرى امزە سەيدىمبەك، اقىن عالىم جايلىباي مەن تاريحشى قويشىعارا سالعارين ورىندادى. شارادا زيالى قاۋىم وكىلدەرى قۇتتىقتاۋ ءسوز سويلەپ، الاش ارداقتىسى تۋرالى ەستەلىكتەرىمەن ءبولىستى»، - دەپ جەتكىزدى ۇلىتاۋ وبلىسى اكىمدىگىنىڭ باسپا ءسوز قىزمەتىنەن.
بۇرىن حابارلاعانىمىزداي، اقسەلەۋ سەيدىمبەكتىڭ 80 جىلدىعىنا وراي، الماتى مەن شىمكەنتتە رەسپۋبليكالىق اقىندار ايتىسى مەن كۇي بايقاۋى وتەدى . سونىمەن قاتار، مەرەيتوي قارساڭىندا ەلوردا كوشەلەرىنىڭ بىرىنە كورنەكتى جازۋشىنىڭ ەسىمى بەرىلدى .
