اۋليەكول اۋدانىنداعى ورماننىڭ باسىم بولىگى كۇلگە اينالدى - قوستاناي وبلىسىنىڭ اكىمى
الاپات ءورتتىڭ زاردابىن جويۋ بويىنشا جۇمىستاردىڭ جايىن بايانداعان قوستاناي وبلىسىنىڭ اكىمى ارحيمەد مۇحامبەتوۆ ءوزىنىڭ رەسمي instagram پاراقشاسىندا وسىلاي جازدى، دەپ حابارلايدى قازاقپارات ءتىلشىسى.
«ايتىپ كەلمەيتىن اپات - ءتىلسىز جاۋ اۋليەكول اۋدانىنداعى وراسان زور ورمان القابىن كۇلگە اينالدىرىپ، 100 دەن اسا ءۇيدى جەرمەن جەكسەن ەتتى. سالدارىنەن جۇزدەگەن جەرلەستەرىمىز باسپاناسىز قالىپ، قۇربان بولعان جاعداي دا تىركەلدى.
الايدا، پرەزيدەنتىمىز قاسىم- جومارت كەمەل ۇلى توقايەۆ توتەنشە جاعدايدى العاشقى كۇننەن باستاپ جەكە باقىلاۋىنا الدى. ءتىپتى، وڭىرگە ارنايى جۇمىس ساپارىمەن كەلىپ، ۇكىمەتكە ءتيىستى تاپسىرمالار بەردى. ناتيجەسىندە ءورت قاۋپى تەز سەيىلىپ، 7-قىركۇيەك كۇنى وڭىردەگى جاعداي تولىق تۇراقتاندى.
كەلەسى كەزەكتە - بۇلىنگەن دۇنيەنى قالپىنا كەلتىرىپ، تۇرعىنداردى ۇيرەنشىكتى ومىرىنە قايتارۋ مىندەتى تۇردى. بۇگىندە تۇرعىن ءۇي قۇرىلىسىنا 2,3 ميلليارد تەڭگە قاراجات ءبولىندى. ەلىمىزدىڭ قۇرىلىس كومپانيالارى ۇيلەردىڭ قۇرىلىسىنا كىرىسىپ كەتتى.
مەملەكەتپەن قاتار، وتاندىق ءىرى كاسىپورىندار، بانكتەر مەن قايىرىمدىلىق قورلارى دا ورتاق ىسكە ات سالىسىپ، ءوز قاراجاتتارىنا ءبىرقاتار الەۋمەتتىك نىسانداردىڭ قۇرىلىسىن باستادى»، - دەپ جازدى ءوڭىر اكىمى ءوزىنىڭ instagram پاراقشاسىندا.
ايماق باسشىسىنىڭ دەرەگىنشە، زارداپ شەككەندەرگە كومەك كورسەتۋ ءۇشىن ارنايى اشىلعان «قايىرىمدىلىق. KZ» قورىنا قازىرگى ۋاقىتتا 700 ميلليون تەڭگەدەن ارتىق قاراجات تۇسكەن. سونىمەن قاتار، ارحيمەد مۇحامبەتوۆ قيىن ساتتە قول ۇشىن بەرگەن بارشا ازاماتتارعا، ءورت سوندىرۋشەلەر مەن دارىگەرلەرگە جانە ەرىكتىلەرگە العىسىن ايتتى.
