جاڭا ءتۇسىرىلىم باستالدى «تۇنگى ستۋديادا نۇرلان قويانبايەۆ»: مۇنداي فورماتتىڭ بولاشاعى بار

- نۇرلان نۇعمان ۇلى، بەس جىل ۇزىلىستەن سوڭ «تۇنگى ستۋديادا نۇرلان قويانبايەۆ» باعدارلاماسى نەلىكتەن الماتى قالاسىندا تۇسىرىلەتىن بولدى؟

- بۇگىن بەس جىل ۇزىلىستەن سوڭ «تۇنگى ستۋديادا نۇرلان قويانبايەۆ» باعدارلاماسى جاڭا ءتۇسىرىلىمىن باستادى. جالپى، باعدارلاما ەلىمىزدە العاش رەت 9 جىل بۇرىن اشىلعان بولاتىن. اراعا بەس جىل سالىپ، بۇگىن الماتى قالاسىندا قايتا ءتۇسىرىلىمىن باستاپ وتىرمىز. نەگىزى ءبىز باعدارلامانى بۇرىنعىداي نۇر- سۇلتان قالاسىنداعى «قازمەديا» ورتالىعىندا تۇسىرەمىز دەپ ويلاعانبىز. ءبىراق، وندا ەشبىر ستۋديا بوس ەمەس ەكەن. سوسىن تاڭداۋىمىز الماتىداعى قازاق تەلەراديو ورتالىعىنىڭ اپپاراتتىق- ستۋديالىق كەشەنىنە ءتۇستى. نەگىزى بۇل جەر ماعان وتە ىستىق. سەبەبى العاشقى جۇمىسىمدى وسى جەردە باستاعانمىن. وسىندا بوس ستۋديا بولدى، ءبىز باعدارلامانى سوندا تۇسىرەمىز دەپ شەشتىك.

- باعدارلامانى ەندى كىمدەر جۇرگىزەدى جانە بۇگىنگى باعدارلامانىڭ بۇرىنعىدان قانداي ەرەكشەلىگى بار؟

- باعدارلامانىڭ بۇرىنعىدان وزگەشەلىگى ونى ەندى ءۇش ادام جۇرگىزەدى. ولار - مەن، بەلگىلى تەلەجۇرگىزۋشى، اكتەر داۋلەت بيجانوۆ جانە اكتريسا قارىنداسىمىز سالتانات سەركەبايەۆا. سونداي- اق باعدارلاما فورماتىن زامان تالابىنا ساي ءسال وزگەرتتىك. ياعني، قازىر ينتەرنەتتە «پودكاست» فورماتى جاقسى دامۋدا. سول سەبەپتى، ءبىز ستۋديادا ءۇش جۇرگىزۋشى، ءبىر قوناق بولادى دەپ شەشتىك. سونداي- اق، جۇرگىزۋشىلەردىڭ سانىن كوبەيتۋدەگى ماقساتىمىز - باعدارلاما ناعىز شوۋ، قىزىقتى ءارى پىكىرتالاس كوبىرەك بولسىن دەگەنىمىز.

- باعدارلاماعا جۇرگىزۋشىسى رەتىندە قايتا قالاي كەلگەنىڭىزدى ايتساڭىز؟

- ماعان «Jibek joly» تەلەارناسىنان ۇسىنىس ءتۇستى. ءبىراز ويلاندىم. سەبەبى، بۇل جاۋاپكەرشىلىگى مول جوبا. وڭاي ەمەس. ءوزىم جۋرناليست بولماعان سوڭ، كەيدە ماعان كەلگەن قوناقتان سۇحبات الۋ قيىنعا سوعىپ جاتادى. شىعارماشىلىقتا جۇرگەن اعالارىممەن، ارىپتەستەرىممەن اقىلداسا كەلە، ۇسىنىستى قابىلدادىم. بۇگىنگى العاشقى تۇسىرىلىمدە قوبالجىدىم. سەبەبى، بۇل بۇرىنعىداي ەمەس، جاڭا ستۋديا، ءىشى دە باسقاشا.

- مۇنداي تۇنگى شوۋلار تۋرالى ويىڭىزدى ايتساڭىز. ول الەمدە جانە قازاقستاندا قالاي دامىپ كەلەدى؟ جالپى، قازاقستاندا باعدارلامانىڭ بولاشاعى بار دەپ ويلايسىز با؟

- «تۇنگى ستۋديادا نۇرلان قويانبايەۆ» باعدارلاماسى - «Late night show» فورماتىنداعى شوۋ. مۇنداي شوۋلار العاش رەت 1960 -جىلدارى ا ق ش- تا اشىلعان. قازىر ينتەرنەت، مەديا قانشا دامىسا دا، مۇنداي شوۋلاردى ءالى كوپ كورەرمەن قىزىعا قارايدى. ونىڭ سەبەبى، ءار زاماننىڭ جۇلدىزى، تانىمال ادامى وعان كەلىپ قاتىسۋىندا دەپ ويلايمىن. مەن قازاقستاندا تۇنگى شوۋعا شاقىراتىن قوناقتارىمىز كوپ ەكەنىنە قۋاندىم. بۇل ەلىمىزدىڭ، قوعامىمىزدىڭ مىقتى ەكەنىن كورسەتسە كەرەك. دەمەك، مەنىڭشە بۇل فورماتتاعى جوبالاردىڭ قازاقستاندا بولاشاعى بار.

- باعدارلاما قاشان كورسەتىلەدى؟

- «تۇنگى ستۋديادا نۇرلان قويانبايەۆ» باعدارلاماسى «Jibek joly» تەلەارناسىنان اپتاسىنا 4 رەت، تۇنگى ساعات 22.00-23.00 اراسىندا كورسەتىلەدى. باعدارلامانى الماتىنىڭ جەرگىلىكتى «Prime band» مۋزىكالىق توبى اۋەنمەن سۇيەمەلدەيتىن بولادى.

- سۇحباتىڭىزعا راحمەت.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى