قىتايدا تۇراتىن قازاق تاستان دومبىرا جاساپ شىعاردى

شىنجاڭنىڭ التاي ايماعىداعى ايدارتال اۋىلىنىڭ تۇرعىنى مۇقامەت ابدىلدابەك ۇلى بۇدان ون جىل بۇرىن جايلاۋدان سالماعى 80 كەلى بولاتىن قارا تاس تاۋىپ الادى. ول تاۋىپ العان تاستى بىردەن بازارعا اپارىپ ساتقىسى كەلەدى. الايدا قارا تاسقا قىزىققان ەشبىر ساۋداگەر بولمايدى. سوسىن مۇقامەتتە تاستان قازاقتىڭ ۇلتتىق اسپابى دومبىرا جاساۋ تۋرالى يدەيا تۋادى.

اۋەسقوي شەبەر مۇقامەت تاۋەكەلگە بەل بۋىپ، قارا تاستى كەسىپ، قاشاپ، مايدالاپ، ۇلكەن تاستان دومبىراسىنىڭ سۇلباسىن جاسايدى. بۇل جۇمىسقا جارتى جىل ۋاقىتىن جۇمسايدى.

«دومبىرانى جاساۋ مەن ويلاعانىمداي وڭاي بولمادى. اسىرەسە، دومبىرانىڭ شاناعىن جاساۋ ەڭ قيىن جۇمىس بولدى. تاستى دوعالداپ قاشاپ، ونان مايدالاعانشا 6 اي ۋاقىت كەتتى. كەيدە ۇساق تاس قيىرشىقتارى كوزىمە ءتۇسىپ، كوزىمدى اشتىرماي قالعان كۇندەر بولدى. ءبىراق سوندا دا جۇمىستى جالعاستىرا بەردىم»، - دەيدى م. ابدىلدابەك ۇلى.

مۇقامەت دومبىرا جاساۋشى شەبەر بولماعاندىقتان، دومبىرا جاساۋ تۋرالى كوپتەگەن تانىمدىق كىتاپتاردى وقيدى ءارى حالىق اراسىنداعى شەبەرلەردەن ۇيرەنە ءجۇرىپ، تاسقا دومبىرا ىشەگىن تاعىپ ءۇن شىعارۋدىڭ سىرىن تابادى. ءسويتىپ وسى جىلدىڭ ناۋرىز ايىنىڭ سوڭىندا تاستان درمبىرانى تولىق جاساپ شىعارادى.

دومبىراشى زاڭعار ادىلەت ۇلى تاستان قاشالىپ جاسالعان دومبىرانى شەرتىپ، تاڭعالعانىن ايتادى.

«مەن بۇل دومبىرانى تۇڭعىش كورگەنىمدە قايران قالدىم ءارى ەرەكشە قۋاندىم. تاسقا دا ءتىل ءبىتىپ، ادەمى ءۇن شىعادى دەپ ويلاماپپىن. مۇندا ءداستۇرلى دومبىرانىڭ وزىندىك ەرەكشەلىگى مەن تاس تابيعاتى ءوزارا جاراسىم تاۋىپ، دومبىرانىڭ ءۇنىن ءتىپتى دە اۋەلەنە تۇسكەن»، - دەيدى ز. ادىلەت ۇلى.

بۇل كۇندە ءابيتان قالاشىعى ماڭىنداعى اۋىل-قىستاقتارداعى مەرەكە-مەيرام وسى تاس دومبىراسىز وتپەيدى.

«مەن قازىر تاستان كوپ تۋىندى جاساپ، جاڭا داۋىردە جاڭاشا كوزقاراسپەن قاراۋدى ۇيرەنۋدەمىن. وسى ءىسىم ارقىلى ساياحاتتاۋشىلاردى ۇلتتىق ونەر مەن ونىڭ تەحنيكانىڭ قابىسۋىنا دەگەن قىزىعۋشىلىعىن ارتتىرىپ، ۇلتتىق مادەنيەتتى دامىتۋعا ۇلەس قوسقىم كەلەدى»، - دەيدى م.

ابدىلدابەك ۇلى قىتايلىق ب ا ق- تىڭ مالىمەتىنشە، تاس دومبىرانىڭ سالماعى 3,58 كەلى.

ايتا كەتسەك، مۇقامەت ابدىلدابەك ۇلى ايدارتال اۋىلىنداعى «شارۋالار شاتتىعى» دەمالىس ءۇيىنىڭ قوجايىنى.

اۆتور: بەيسەن سۇلتان

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى