قازاقستان حالىقارالىق اسكەري مەديتسينا كوميتەتىنە باقىلاۋشى بولدى
بۇل تۋرالى قازاقپارات س ءى م سىلتەمە جاساپ حابارلايدى.
ەلىمىزدىڭ كانديداتۋراسىن وسى ۇكىمەتارالىق ۇيىمعا مۇشە 119 مەملەكەتتىڭ بارلىعى قولدادى.
2022-جىلى ق ر بەلگياداعى ەلشىلىگىنىڭ باستاماسىمەن ق ر سىرتقى ىستەر مينيسترلىگى ق ر قورعانىس مينيسترلىگىمەن بىرلەسە مەملەكەتىمىزدىڭ ءتيىستى ءوتىنىشىن ەنگىزۋدى پىسىقتادى. اعىمداعى جىلدىڭ 5-9- قىركۇيەگى ارالىعىندا ۇيىمنىڭ بريۋسسەلدە وتكەن كەزەكتى الەمدىك كونگرەسى بارىسىندا مۇشە مەملەكەتتەر ونى وڭ باعالاعان.
قازاقستان دەلەگاتسياسىنا ارناعان سوزىندە ح ا م ك 44- الەمدىك كونگرەسىنىڭ ءتوراعاسى دەۆيد سميت قازاقستاننىڭ اسكەري-مەديتسينالىق قىزمەتى اسكەري مەديتسينا سالاسىنداعى حالىقارالىق ىنتىماقتاستىققا مازمۇندى ۇلەس قوسا الاتىنىنا سەنىمدى ەكەنىن جەتكىزدى.
ءوز كەزەگىندە، كەزدەسۋگە قاتىسۋشىلار الدىندا ءسوز سويلەگەن قازاقستاننىڭ بەلگياداعى ەلشىسى مارعۇلان بايمۇحان ح ا م ك- كە باقىلاۋشى مارتەبەسىن الۋ قازاقستاندىق ماماندارعا ۇيىمنىڭ مۇشە مەملەكەتتەردىڭ اسكەري-مەديتسينالىق قىزمەتتەرىنىڭ كاسىبي دەڭگەيىن كوتەرۋگە باعىتتالعان بارلىق ءىس-شارالارىنا قاتىسۋعا مۇمكىندىك بەرەتىنىن جانە وسى ماڭىزدى سالادا تاجىريبە الماسۋ ءۇشىن پايدالى الاڭدى قامتاماسىز ەتەتىنىن باسا ايتتى.
قازاقستان رەسپۋبليكاسىنىڭ قارۋلى كۇشتەرىندە اسكەري قىزمەتشىلەردىڭ دەنساۋلىعىن قورعاۋ جانە مەديتسينالىق جاردەمگە قۇقىقتارىن ىسكە اسىرۋدى قامتاماسىز ەتەتىن مەديتسينالىق قامتاماسىز ەتۋدىڭ كوپ دەڭگەيلى جۇيەسى قالىپتاسقان جانە سەنىمدى جۇمىس ىستەۋدە. بۇگىندە قازاقستاننىڭ اسكەري مەديتسينا جۇيەسى 20 اسكەري-مەديتسينالىق مەكەمەنى جانە 130 دان استام مەديتسينالىق بولىمشەنى قامتيدى.
ايتا كەتسەك، حامك الەمدەگى قارۋلى كۇشتەردىڭ مەديتسينالىق قىزمەتتەرى اراسىنداعى ىنتىماقتاستىقتى نىعايتۋ ماقساتىندا 1921-جىلى قۇرىلعان. كوميتەت جارعىسى مەن تاريحي داستۇرىنە سايكەس باس حاتشىسىنىڭ كەڭسەسى بەلگيادا ورنالاسادى. بۇل حالىقارالىق ۇيىم ب ۇ ۇ، دۇنيەجۇزىلىك دەنساۋلىق ساقتاۋ ۇيىمى جانە حالىقارالىق قىزىل كرەست كوميتەتىمەن تىعىز ىنتىماقتاستىقتا. ونىڭ نەگىزگى مىندەتتەرى - بارلىق مەملەكەتتەردىڭ اسكەري مەديتسينالىق قىزمەتتەرى اراسىنداعى كاسىبي ىنتىماقتاستىق بايلانىستارىن نىعايتۋ؛ عىلىمي زەرتتەۋلەردى ىلگەرىلەتۋ؛ اسكەري مەديتسينا ءۇشىن ماڭىزدى ماسەلەلەر بويىنشا وقىتۋ، اتاپ ايتقاندا قارۋلى كۇشتەردىڭ مەديتسينالىق قىزمەتىنىڭ جاس وفيتسەرلەرىنىڭ بىلىكتىلىگىن ارتتىرۋ كۋرستارىن ۇيىمداستىرۋ.
