گولوۆكين كانەلومەن جەكپە-جەگى تۋرالى: كەز كەلگەن جاعدايعا دايىنمىن
«كۇرەس جوسپارىم مەن ستراتەگيام بار. جەكپە-جەك ەكى بوكسشىدان تۇرادى. كانەلو ەڭ الدىمەن نە ۇسىناتىنىن كورەيىك. مەن كەز كەلگەن جاعدايعا دايىنمىن. ول جاقىن قاشىقتا جۇدىرىقتاسقىسى كەلسە، سولاي بولادى، ول الىس قاشىقتى كوزدەسە، الىستان بولادى. بۇل جەكپە-جەكتى ەكى سپورتشى جاسايتىنىنا سەنىمدىمىن. جەكپە-جەكتە ءارتۇرلى بولىكتە كىم جاقسى كورىنەتىنىن كورەيىك»، - دەدى گولوۆكين The Fight with Teddy Atlas پودكاسىندا.
سونداي-اق، GGG قازىرگى جاتتىقتىرۋشىسى دجوناتان بەنكس پەن بۇرىنعى جاتتىقتىرۋشىسى ابەل سانچەستىڭ جۇمىسىن سالىستىردى. 2019-جىلعى ساۋىردە گولوۆكين توعىز جىلدىق ىنتىماقتاستىقتان كەيىن سانچەستەن كەتىپ، بەنكستى ءوزىنىڭ جاڭا تالىمگەرى رەتىندە تاڭداعان.
«بۇل ەكى جەكپە-جەكتى ءۇشىنشى جەكپە-جەكپەن سالىستىرۋ دۇرىس بولمايدى، ويتكەنى ۋاقىت ءارتۇرلى. مەنىڭ ەكى جاتتىقتىرۋشىمنىڭ قادىر-قاسيەتىن تومەندەتكىم كەلمەيدى، ولار - مەن ءۇشىن وتە جاقسى ماماندار»، - دەدى ول.
ەسكە سالايىق، گولوۆكين مەن كانەلونىڭ ءۇشىنشى جەكپە-جەگى 17- قىركۇيەكتە وتەدى. كەزدەسۋ لاس-ۆەگاستاعى (نيەۆادا، ا ق ش) T- Mobile Arena-دا وتەدى. بۇعان دەيىن ولاردىڭ جەكپە-جەگىنىڭ ءبىرىنشىسى داۋلى تەڭ ناتيجەمەن اياقتالسا، ەكىنشىسىندە تورەشىلەردىڭ شەشىمىمەن مەكسيكالىق بوكسشى جەڭىسكە جەتكەن ەدى.
