پرەزيدەنتتىڭ ءوزى حابارلاسىپ قۇتتىقتايتىنىن كۇتپەدىم - جاس تەننيسشى الان قۇرمانعاليەۆ

جۇرتشىلىق جاس سپورتشىنى اۋەجايدان شاشۋ شاشىپ، دومبىرامەن ءان ايتىپ، ەرەكشە كوڭىل- كۇيمەن كۇتىپ الدى.

«مەنى كۇتىپ الىپ، قۇرمەت كورسەتىلىپ جاتقانىنا وتە قۋانىشتىمىن. وسىنشا حالىق بولادى دەپ كۇتپەدىم. تاياۋداعى جوسپارعا كەلسەك، الماتىدا ۇستەل تەننيسىنەن حالىقارالىق تۋرنير وتەدى، سوندا باق سىنايمىن. ازيا چەمپيوناتىنا دەيىن بىرنەشە رەت رەسپۋبليكالىق جانە حالىقارالىق تۋرنيرلەرگە قاتىسىپ، جەڭىسكە جەتكەنمىن. دەگەنمەن بۇل جارىستىڭ ءجونى بولەك»، - دەدى الان قۇرمانعاليەۆ تىلشىلەرگە سۇحبات بەرە تۇرىپ.

ايتۋىنشا، 15 جاستاعى قاراعاندىلىق جاس ءوسپىرىم ۇستەل تەننيسىمەن 8 جاسىنان اينالىسىپ كەلەدى.

سونداي-اق جاس تەننيسشى ق ر پرەزيدەنتى قاسىم-جومارت توقايەۆتىڭ جەكە قۇتتىقتاۋى كۇتپەگەن سىي بولعانىن ايتتى.

«باسقا-باسقا پرەزيدەنتتىڭ ءوزى حابارلاسىپ قۇتتىقتايدى دەپ كۇتپەدىم. جەڭىسىممەن قۇتتىقتاپ، دايىندىقتى ودان ءارى جالعاستىرىپ، وسى بەتىمنەن قايتپاي، ءىرى جەڭىستەرگە جەتە بەرۋىمە تىلەك ءبىلدىردى»، - دەيدى ول.

ەسكە سالساق، لاوستا وتكەن جاسوسپىرىمدەر مەن كادەتتەر اراسىنداعى ۇستەل تەننيسىنەن ازيا چەمپيوناتىنىڭ قولا جۇلدەگەرى الان قۇرمانعاليەۆتى مەملەكەت باسشىسى قاسىم-جومارت توقايەۆ تەلەفون ارقىلى قۇتتىقتاعان ەدى.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى