الماتىداعى اتىشۋلى سەمەنت زاۋىتىن جابۋ ماسەلەسى جوعارعى سوتتا شەشىلەدى
بۇل تۋرالى ماسەلەنى الماتى اكىمى ەربولات دوسايەۆتىڭ جەتىسۋ اۋدانى تۇرعىندارىمەن كەزدەسۋىندە قالا تۇرعىنى كوتەردى، دەپ حابارلايدى قازاقپارات ءتىلشىسى.
الماتىلىقتار 9 جىل بولدى ۇيلەرىنىڭ جانىنداعى سەمەنت زاۋىتىنىڭ جابىلۋىنا قول جەتكىزە الماي كەلەدى. قالا تۇرعىنىنىڭ ايتۋىنشا، سوت بارلىق رۇقسات قۇجاتتارىن قايتارىپ الۋ تۋرالى شەشىم شىعارىپ قويعان.
«الايدا زاۋىت ءالى جۇمىس ىستەپ تۇر. ءبىز التى سوتتا جەڭگەن ەدىك. ءبىراق، قازىر ءبارى دە ورىنداۋشىنىڭ شەشىمىن كۇتۋمەن وتىر»، - دەيدى قالا تۇرعىنى.
قالا باسشىسى سوتتىڭ سوڭعى شەشىمى بيىل 1-قىركۇيەكتە شىعارىلعانىن، الايدا، كومپانيانىڭ زاڭگەرلەرى كاسساتسيالىق شاعىم بەرىپ جاتقانىن مالىمدەدى.
«قولدانىستاعى زاڭناما بويىنشا تۇپكىلىكتى سوت شەشىمى شىعارىلعانعا دەيىن بىزگە شارا قابىلداۋعا بولمايدى. بيزنەستى قورعاۋدىڭ بۇگىنگى زاڭدارى مەن ەرەجەلەرى الماتى اكىمىنىڭ وكىلەتتىگى شەكتەۋلى ەكەنىن كورسەتەدى. مەن زاڭسىزدىقپەن اينالىسا المايمىن. كەرىسىنشە، زاڭ جۇزىندە جۇرگەنىمدى كورسەتۋىم كەرەك. ەگەر ءسىز زاۋىتتىڭ جۇمىسىن توقتاتۋ جولىن بىلسەڭىز، ايتىڭىز. مەن قازىر-اق تاپسىرما بەرەيىن. ەگەر ەكولوگيالىق زاڭنامادا قاتاڭ وزگەرىستەر بولسا، ءبىز زاۋىتتىڭ جۇمىسىن بىردەن توقتاتا الۋشى ەدىك. ءبىراق، بۇل ماسەلەنى ءبىز سىزدەرمەن بىرگە جوعارعى سوتتا شەشەتىن بولامىز»، - دەدى ەربولات دوسايەۆ.
