اكىم پاۆلودار وبلىسىنىڭ بارلىق اۋدانىنداعى ەڭ وزەكتى ماسەلەنى ايتىپ بەردى
پاۆلودار وبلىسىنىڭ اكىمى قالا مەن اۋدان اكىمدەرى، وبلىستىق باسقارما باسشىلارىنىڭ قاتىسۋىمەن ق ر پرەزيدەنتىنىڭ «ءادىل مەملەكەت. ءبىرتۇتاس ۇلت. بەرەكەلى قوعام» اتتى قازاقستان حالقىنا جولداۋىن جۇزەگە اسىرۋ ماسەلەلەرى بويىنشا جيىن وتكىزدى.
نەگىزگى باعىتتار تۋرالى وبلىس اكىمىنىڭ ورىنباسارلارى اقپارات جەتكىزدى.
وبلىس اكىمىنىڭ ءبىرىنشى ورىنباسارى ولەگ كرۋك ايتىپ وتكەندەي، كەلەسى جىلى وڭىردە ينجەنەرلىك جەلىلەردىڭ قۇرىلىسى مەن كۇردەلى جوندەۋى بويىنشا 20 جوبانى جۇزەگە اسىرۋ جوسپارلانعان.
بۇل جەلىلەردىڭ توزۋ دەڭگەيىن قىسقارتۋعا مۇمكىندىك بەرەدى.
كەڭەس بارىسىندا ءابىلقايىر سقاقوۆ مەملەكەت باسشىسىنىڭ تاپسىرمالارىن ورىنداۋ بويىنشا ناقتى مىندەتتەر قويدى.
ماسەلەن، ەنەرگيا ءوندىرۋ قۋاتىنىڭ نارىعىن كەڭەيتۋ جانە «ينۆەستيتسيالاردىڭ ورنىنا تاريفتەردى قايتا قاراۋ» تۇجىرىمداماسىنا قاتىستى ق ر ەنەرگەتيكا مينيسترلىگىنە ۇسىنىس جولداۋعا بەلسەندى قاتىسۋ مىندەتتەلدى.
ودان باسقا، وبلىستا پايدالانىلمايتىن جانە زاڭنامانى بۇزۋ ارقىلى بەرىلگەن جەرلەردى قايتارۋ بويىنشا جۇمىس ءجۇرىپ جاتىر.
ايتالىق، مەملەكەت مەنشىگىنە 208,1 مىڭ گەكتار جەر قايتارىلدى. جوسپار بويىنشا جىل سوڭىنا دەيىن 100 مىڭ گەكتار جەردى قايتارۋ كوزدەلگەن.
ءابىلقايىر سقاقوۆ بۇل باعىتتاعى جۇمىستى كۇشەيتۋدى تاپسىردى.
- جايىلىم ماسەلەسى اسا كۇردەلى بولىپ تۇر، قاراپايىم ادامدار جايىلىم تابا الماي دال بولۋدا. قازىردە بارلىق اۋداندارداعى ەڭ وزەكتى ماسەلە - جايىلىم. ءبىر اۋىل مىسالىندا ارنايى كارتا سىزۋ كەرەك. بارلىعىن تارتىپكە كەلتىرەتىن ۋاقىت كەلدى، - دەدى وبلىس اكىمى.
ق ر پرەزيدەنتىنىڭ جولداۋى مەملەكەتتىك ساياساتتاعى الەۋمەتتىك سالانىڭ باسىمدىعىن تاعى ءبىر دالەلدەدى.
ەڭ تومەنگى جالاقىنىڭ مولشەرى 60 مىڭنان 70 مىڭ تەڭگەگە دەيىن وسىرىلەدى.
وبلىس اكىمىنىڭ ورىنباسارى ايزادا قۇرمانوۆا ايتىپ وتكەندەي، 2023 -جىلدىڭ 1-قاڭتارىنان باستاپ وبلىس بويىنشا 21 مىڭ ادام مەملەكەتتىك قولداۋعا يە بولادى.
سونىمەن بىرگە، وتباسىلارعا ەلەكتروندىق جۇيە ارقىلى الەۋمەتتىك كومەك كورسەتۋگە مۇمكىندىك بەرەتىن وتباسىنىڭ تسيفرلىق كارتاسى پيلوتتىق رەجيمدە ەنگىزىلدى.
