قوستاناي وبلىسىندا ورتەنگەن ءۇيدىڭ ورنىنان ادام دەنەسى تابىلدى

بۇل تۋرالى توتەنشە جاعدايلار مينيسترلىگى ورتكە قارسى قىزمەت كوميتەتى ءتوراعاسىنىڭ ورىنباسارى دميتري تيتوۆ ءمالىم ەتتى، دەپ حابارلايدى قازاقپارات ءتىلشىسى.

«قازىر قوستانايداعى ءورتتىڭ اۋماعى 42 مىڭ گەكتار بولىپ وتىر. ءتىلسىز جاۋدىڭ سالدارىنان 91 تۇرعىن ءۇي ورتەنىپ كەتتى. 2 مىڭنان استام ادام ەۆاكۋاتسيالاندى. بۇگىندە ولار ءوز ۇيلەرىنە ورالدى. سونداي-اق، ورتەنگەن ءۇيدىڭ ورنىنان ءبىر ادامنىڭ دەنەسى تابىلدى»، - دەدى دميتري تيتوۆ ورتالىق كوممۋنيكاتسيالار قىزمەتى الاڭىندا وتكەن باسپا ءسوز ءماسليحاتىندا.

ونىڭ ايتۋىنشا، اتالعان وڭىردەگى ورتپەن كۇرەسكە 2 مىڭنان استام مامان جۇمىلدىرىلدى.

«ولاردىڭ قاتارىندا ءبىزدىڭ مامانداردان بولەك، قورعانىس مينيسترلىگى، ىشكى ىستەر مينيسترلىگى، جەرگىلىكتى اتقارۋشى ورگانداردىڭ وكىلدەرى بار. بۇگىن ساعات 15:00 دەگى جاعداي بويىنشا قوستاناي وبلىسىنداعى ءورت اۋىزدىقتالدى»، - دەدى دميتري تيتوۆ.

بۇعان دەيىن قوستاناي وبلىسى امانقاراعايدا ۇيىندىلەر استىنان جوعالعان ەر ادامنىڭ ىزدەستىرىلىپ جاتقانى تۋرالى حابارلاعان ەدىك.

ايتا كەتەيىك، توتەنشە جاعدايلار ءمينيسترى يۋري يلين قوستاناي وبلىسىندا تابيعي ءورت اۋىزدىقتالعانى تۋرالى مالىمدەگەن ەدى.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى