الماتىدا قىزداردى تۇنشىقتىرىپ، توناپ كەلگەن كۇدىكتى ۇستالدى
المالى اۋداندىق پوليتسياسىنىڭ حابارلاۋىنشا، ەش جەردە جۇمىس ىستەمەيتىن 20 جاستاعى ا. قىلمىسىن تەك تۇنگى ۋاقىتتا جاساعان. جولدا جالعىز كەلە جاتقان قىزدارعا ارتتان تاپ بەرىپ، تۇنشىقتىرىپ، سودان كەيىن بارلىق باعالى زاتتارىن الىپ كەتىپ وتىرعان.
«جەدەل ىزدەستىرۋ ءىس-شارالارى بارىسىندا 20 جاستاعى جامبىل وبلىسىنىڭ تۇرعىنى ۇستالدى. قازىرگى ۋاقىتتا توناۋ بويىنشا ءۇش دەرەكتى انىقتادىق. ءبىر ەپيزود بەينەباقىلاۋ كامەرالارىنا ءتۇسىپ قالعان. قىزدار توتەپ بەرە المايتىن جاعدايعا جەتكەن كەزدە، ول بارلىق قۇندى زاتتارىن: ۇيالى تەلەفون، اقشاسىن الىپ، قاراڭعى كوشەلەردە تىعىلىپ قالدى. سونداي-اق، قاسكوي جابىرلەنۋشىدەن تارتىپ العان اقشامەن دۇكەندە تولەم جاساپ جاتقان دەرەك تە تىركەلدى. جاس جىگىت ءوز ءىسىن مويىندادى. قازىر كۇدىكتىنىڭ جەكە باسى قالا اۋماعىندا وسىعان ۇقساس، بۇرىن جاسالعان قىلمىستارعا قاتىسى بار-جوعىنا تەكسەرىلىپ جاتىر. سوتقا دەيىنگى تەرگەۋ امالدارى باستالدى»، - دەدى المالى اۋداندىق پوليتسيا باسقارماسىنىڭ باستىعى ەسەن ىسقاقوۆ.
