شەتەل فيلمدەرىن قازاق تىلىنە دۋبلياجداۋعا مەملەكەت تاراپىنان قولداۋ كورسەتىلەدى
بۇل تۋرالى ءماجىلىستىڭ جالپى وتىرىسىندا كينەماتوگرافيا جانە مادەنيەت ماسەلەلەرى بويىنشا زاڭ جوباسىن تالقىلاۋ كەزىندە مادەنيەت جانە سپورت ءمينيسترى داۋرەن ابايەۆ ايتتى، دەپ حابارلايدى قازاقپارات ءتىلشىسى.
«شەتەل انيماتسيالىق فيلمدەرىن جانە وتباسىلىق فيلمدەردى قازاق تىلىنە دۋبلياجداۋدى مەملەكەتتىك قولداۋ قاراستىرىلعان. ولاردى ىرىكتەۋ ءتارتىبى مەن كريتەرييلەرى انىقتالدى»، - دەدى د. ابايەۆ.
سونىمەن قاتار ول ەلىمىزدە فيلم تۇسىرۋگە سۋبسيديا الۋعا ۇمىتكەر حالىقارالىق كينوستۋديالارعا قويىلاتىن تالاپتار جەڭىلدەتىلەتىنىن ايتتى.
«قولدانىستاعى مەحانيزمگە سايكەس، ينۆەستوردىڭ مينيمالدى جارناسى 130 مىڭ ا ە ك بولۋى كەرەك. بۇل شامامەن 850 مىڭ ا ق ش دوللارىن قۇرايدى. ءوز اۋماعىندا حالىقارالىق كينوجوبالاردى ءساتتى جۇزەگە اسىرۋ تاجىريبەسى جوق مەملەكەت ءۇشىن مۇنداي كورسەتكىش تىم جوعارى. وسى ورايدا، «كينەماتوگرافيا تۋرالى» زاڭنىڭ 15- بابىنان قازاقستان رەسپۋبليكاسىنىڭ اۋماعىنداعى فيلم وندىرىسىنە سالىناتىن قاراجاتتىڭ تومەنگى شەگى ءسوزى الىنىپ تاستالادى»، - دەدى مينيستر.
ونىڭ سوزىنە قاراعاندا، ۇلتتىق فيلمدەرگە قاراستىرىلاتىن قاراجاتتى ءبولۋدىڭ جاڭا تاسىلدەرى ۇسىنىلادى. ياعني 70 پايىزى تاريحي، پاتريوتتىق جانە يميدجدىك جوبالارعا، 30 پايىزدى جەكە كينوجوبالاردى قوسالقى قارجىلاندىرۋعا ەسكەرىلگەن.
بۇدان بۇرىن حابارلانعانداي، ءماجىلىستىڭ جالپى وتىرىسىندا «قازاقستان رەسپۋبليكاسىنىڭ كەيبىر زاڭنامالىق اكتىلەرىنە كينەماتوگرافيا جانە مادەنيەت ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭ جوباسى ماقۇلداندى.
