پروكۋرورلار قانداي جاعدايدا تەكسەرۋلەر جۇرگىزەدى - زاڭ جوباسى
«زاڭ جوباسى كونستيتۋتسيانىڭ 83-بابىنا سايكەس ازىرلەندى. كونستيتۋتسيانىڭ بۇل بابىندا پروكۋراتۋرانىڭ نەگىزگى فۋنكسيالارى بەكىتىلگەن. ولار - مەملەكەت اتىنان جوعارى قاداعالاۋ مەن قىلمىستىق قۋدالاۋدى جۇزەگە اسىرۋ جانە سوتتا مەملەكەت مۇددەسىن ءبىلدىرۋ. كونستيتۋتسيادا جوعارى قاداعالاۋ ءارى سوتتا مەملەكەت مۇددەلەرىن ءبىلدىرۋ زاڭدا بەلگىلەنگەن شەكتە جانە نىسانداردا جۇزەگە اسىرىلادى دەلىنگەن. زاڭ جوباسىندا ءبىز وسى كونستيتۋتسيالىق ۇستانىمداردىڭ شەگىنەن شىقپايمىز، تەك پروكۋراتۋرانىڭ قاداعالاۋ جانە باسقا دا وكىلەتتىكتەرىن ناقتىلاپ اشىپ، ءبىر جۇيەگە كەلتىرەمىز»، - دەدى ق ر باس پروكۋرورىنىڭ ورىنباسارى اسەت شىنداليەۆ
ءبىرىنشى تاراۋدا پروكۋراتۋرا قىزمەتىنىڭ ماقساتتارى مەن پرينتسيپتەرى، قۇقىقتىق نەگىزدەرى جانە باسقا دا ماسەلەلەر بەرىلگەن. ەكىنشى تاراۋدا پروكۋراتۋرانىڭ جۇيەسى ناقتىلانىپ، وندا ءتيىستى قۇزىرەتتەر انىقتالدى.
«قۇجاتتا ءار بۋىنداعى پروكۋراتۋرا ورگاندارىنا توقتالىپ، ولاردىڭ قۇزىرەتىن بەكىتتىك. اتاپ ايتساق، باس پروكۋراتۋرا قۇقىقتىق ستاتيستيكا جانە ارنايى ەسەپكە الۋ كوميتەتى، قۇقىق قورعاۋ ورگاندارى اكادەمياسى، وبلىستىق، اۋداندىق نەمەسە اسكەري جانە كولىك پروكۋراتۋرالارىنا دەربەس توقتالىپ، ولاردىڭ نەگىزگى قىزمەتتەرى بەكىتىلگەن. پروكۋراتۋرا ورگاندارىنىڭ وكىلەتتىگى جەكە باپتا كورسەتىلەدى. ول باپتا اۋداندىق ساتىدان باستاپ، باس پروكۋراتۋراعا دەيىن قانداي قۇقىقتار مەن مىندەتتەر بار ەكەنى انىق كورسەتىلگەن. ءبىز ولاردى جۇيەگە كەلتىرىپ، بارىنشا كونستيتۋتسيالىق زاڭدا بەكىتۋگە ۇمتىلدىق»، - دەدى باس پروكۋروردىڭ ورىنباسارى.
سونىمەن قاتار ول زاڭ جوباسىندا جوعارى قاداعالاۋدىڭ ءۇش نىسانى بەكىتىلگەنىن ايتتى. ولاردىڭ قاتارىندا تەكسەرۋ جۇرگىزۋ، زاڭدىلىقتىڭ جاي-كۇيىنە تالداۋ جاساۋ، كۇشىنە ەنگەن اكتىلەردى باعالاۋ ەسكەرىلگەن.
«تەكسەرۋدى پرەزيدەنتتىڭ، باس پروكۋروردىڭ تاپسىرماسى جانە وبلىستار مەن اۋدان پروكۋرورلارىنىڭ شەشىمى بويىنشا جۇرگىزەتىن بولامىز»، - دەدى ءا. شىنداليەۆ.
وتىنىشتەردى قاراعاندا نەمەسە تەكسەرۋ جۇرگىزگەن كەزدە پروكۋرور 3 جۇمىس كۇنگە دەيىن لاۋازىمدى ادامداردىڭ اكتىلەرى مەن ارەكەتتەرىن توقتاتا تۇرۋعا قۇقىلى.
مۇنداي قادام ادام ءومىرى مەن دەنساۋلىعىنا، مەملەكەت مۇددەسىنە زيان كەلۋى مۇمكىن بولعان جاعدايدا ىسكە اسىرىلادى. وتىنىشتەر بويىنشا پروكۋرور ءوزى تەكسەرۋ جۇرگىزە الادى نەمەسە تەكسەرۋدى وكىلەتتى ورگانعا تاپسىرادى.
