تارتىل-فەست - گراند- فينال جەڭىمپازدارى فينلياندياعا الەم چەمپيوناتىنا بارادى
بۇل تۋرالى Tartyl Fest امباسسادورى ايتىم جاقىپوۆ ايتتى، دەپ حابارلايدى قازاقپارات ءتىلشىسى.
بۇعان دەيىن حابارلانعانداي، بۇگىن تۋرنيردىڭ سوڭعى كەزەڭى نۇر- سۇلتاندا ءوتتى. جارىسقا قاتىسۋ ءۇشىن 650-گە جۋىق استانالىق تىركەلگەن.
ايتىم جاقىپوۆتىڭ ايتۋىنشا، قازاقستاندا كوشە سپورتى - street workout وتە جاقسى دەڭگەيدە دامىعان.
«قازاقستان - street workout باعىتىن دامىتۋ بويىنشا وزىق ەل دەپ باتىل ءارى اشىق ايتا الامىن. قازاقستان street workout باعىتىن مەملەكەتتىك دەڭگەيدە قولدايتىن جالعىز ەل»، - دەدى ايتىم جاقىپوۆ فەستيۆال اياسىندا جۋرناليستەرگە.
جوبا امباسسادورى جاستار مەن Street workout Kazakhstan قوزعالىسىنىڭ اتىنان پرەزيدەنتكە جاستاردىڭ دامۋىنا قوسقان ۇلەسى مەن قولداۋى ءۇشىن العىس ءبىلدىردى.
«جاستار - ەلىمىزدىڭ جانە الەمنىڭ بولاشاعى. ءبىز كوماندامەن 20 قالانى ارالادىق، 18 مىڭ شاقىرىمنان استام جول جۇردىك، 12 مىڭنان استام قاتىسۋشىنى تىركەدىك. گراند- فينال جەڭىمپازدارى فينليانديادا وتەتىن الەم چەمپيوناتىنا قاتىسا الادى. سپورتشى رەتىندە مەن ءۇشىن بۇگىنگى تاڭدا بۇل سپورتقا ۇلكەن سەرپىن مەن قولداۋ بار ەكەندىگى وتە ماڭىزدى. كەلەسى جىلى قاتىسۋشىلاردىڭ سانى، فەستيۆال ناتيجەلەرى مۇلدەم باسقاشا بولادى دەپ ويلايمىن. سەبەبى بالالار تولىق دايىندالاتىن بولادى»، - دەدى ايتىم جاقىپوۆ.
سپيكەردىڭ ايتۋىنشا، گراند- فينال قازان ايىندا نۇر-سۇلتان قالاسىندا وتەدى. فينال كۇنى كەيىنىرەك جاريالانادى.
ءبىرىنشى ورىن ءۇشىن 200 مىڭ تەڭگە اقشالاي سىيلىق بەرىلەدى، ەكىنشى ورىن ءۇشىن - 100 مىڭ تەڭگە؛ ءۇشىنشى ورىن ءۇشىن - 50 مىڭ تەڭگە.
فەستيۆال 10-شىلدە مەن 6-قىركۇيەك ارالىعىندا ەلىمىزدىڭ 20 قالاسىندا ۇيىمداستىرىلدى، ءار قالادا 27 جەڭىمپاز انىقتالدى.
تۋرنيككە تارتىلۋ فەستيۆالى 10-شىلدەدە قونايەۆ قالاسىندا باستالعان ەدى.
كەيىن تۇركىستاندا، تالدىقورعان، الماتى، تاراز، شىمكەنت، اقتاۋ، قىزىلوردا، اتىراۋ، ورال، اقتوبە، قوستاناي، پەتروپاۆل، كوكشەتاۋ، جەزقازعان، قاراعاندى، وسكەمەن، سەمەي قالالارىندا جالعاسىن تاپتى.
شىمكەنتتىك ازامات ساپار تۋرنيكتە 41 رەت تارتىلىپ، رەكورد ورناتتى. بۇعان دەيىن تۋرنيككە تارتىلۋ بويىنشا رەكورد جاساعان الماتىلىقتاردى (40) باسا وزىپ، مىقتىلىعىن دالەلدەدى. ال، 13 رەت تارتىلعان جەتى جاسار ءماديحان قاجىمۇقان ۇيىمداستىرۋشىلاردىڭ ارنايى سىيلىعىنا يە بولدى.
ودان كەيىن اقتاۋ قالاسىندا 32 جاستاعى قاتىسۋشى دامير نابيەۆ بەلتەمىرگە 44 رەت تارتىلىپ، جاڭا رەكورد ورناتتى.
بۇل رەكوردتى 51 جاستاعى قوستانايلىق اندرەي انتونيان جاڭارتتى، ول تۋرنيككە 45 رەت تارتىلدى.
قاراعاندىدا وتكەن تۋرنيردە تارازدىق ەۆگەني نام ەسىمدى قاتىسۋشى تۋرنيككە 50 رەت تارتىلدى. نۇر-سۇلتاندا رەكورد جاڭارتىلمادى. وسىلايشا، Tartyl Fest رەكوردى تاراز قالاسىنا تيەسىلى.
