پەتروپاۆلداعى قازاق تەاترى قۇرىلىسى پايدالانۋعا بەرىلمەك
6-قىركۇيەك كۇنى س ق و اكىمى قۇمار اقساقالوۆ پەتروپاۆلداعى جاڭادان سالىنىپ جاتقان قازاق تەاترىنىڭ قۇرىلىسىندا بولدى. 2019 -جىلى ىسكە قوسىلۋى ءتيىس مادەنيەت نىسانى مەردىگەر كومپانيانىڭ ءوز مىندەتتەمەلەرىن ۋاقىتىندا ورىنداماۋىنان سالىنباي تۇرىپ قالدى. سوت ارقىلى ول جوسىقسىز قىزمەت كورسەتۋ ۇيىمى دەپ تانىلىپ، قۇرىلىس جەرگىلىكتى كومپانيالاردىڭ بىرىنە بەرىلدى.
قازىر مۇندا جۇمىس قىزعان. قۇرىلىستىڭ % 75-80 اتقارىلدى.
«قازاق تەاترىندا ءار قىزمەتتىڭ تولىق جابدىقتالعان ءوز بولمەلەرى بولادى. اكۋستيكالىق جۇيەسى بار ارلەۋ ماتەريالدارىن الىس شەتەلدەن اكەلىپ جاتىرمىز. ول ساحنادا ارتىستەن ونەر كورسەتىپ جاتقاندا، قالعاندارى كەدەرگى كەلتىرمەس ءۇشىن جاسالعان. سونداي-اق دىبىس ساپالى، تازا شىعۋى ءۇشىن وسىنداي قىمبات جانە زاماناۋي ماتەريالداردى قولدانىپ جاتىرمىز. ەكىنشى قاباتتا ەكى بۋفەت بولادى. ول كورەرمەندەر ءبىر- بىرىنە كەدەرگى كەلتىرىپ، كەزەك كۇتپەۋى ءۇشىن جاسالعان.
قازان ايىندا قۇرىلىستى اياقتاۋدى جوسپارلاپ وتىرمىز. ءقازىر بۇل جەردە 150 ادام ەڭبەك ەتىپ جاتىر. دەمالىسسىز قۇرىلىس باسىندا ءجۇر. بيىل مىندەتتى تۇردە تەاتردى پايدالانۋعا بەرەمىز. جوبانىڭ جالپى قۇنى 4 ميلليارد تەڭگە»، - دەيدى س ق و قۇرىلىس باسقارماسىنىڭ باسشىسى قايروللا عالەيەۆ.
قازاق دراما تەاترى 500 ورىنعا شاقتالعان. مۇندا 64 گريدەۋ بولمەسى بولماق. ال مادەنيەت نىسانى قالىپتى جۇمىس ىستەۋى ءۇشىن 350 ادام جۇمىسقا الىنباق.
مامانداردىڭ ايتۋىنشا، توبەسى كوپدەڭگەيلى بولادى، قابىرعالارى ۇلتتىق ناقىشتا بەزەندىرىلەدى. ال ءمارمار باسپالداق عيماراتتىڭ كوركىن اشا تۇسپەك.
