استراحاندا قازاقستاننىڭ رەسەيدەگى مادەنيەت كۇندەرى باستالدى

قازاقپارات بۇل تۋرالى ق ر ەلشىلىگىنە سىلتەمە جاساپ حابارلايدى.

ءىس- شارا قازاقستان مەن رەسەي اراسىنداعى ديپلوماتيالىق قارىم- قاتىناستىڭ 30 جىلدىعىنا ورايلاستىرىلعان.

كەشتى اشقان اتىراۋ وبلىسى اكىمىنىڭ ورىنباسارى قايرات نۇرتايەۆ پەن ق ر مادەنيەت جانە سپورت مينيسترلىگىنىڭ مادەنيەت كوميتەتى ءتوراعاسىنىڭ ورىنباسارى كۇمىس سەيىتوۆا الداعى ءىس- شارالاردىڭ ماڭىزدىلىعىنا توقتالىپ، قازاقستان مەن رەسەي حالقىن سان عاسىرلىق ورتاق تاريح، ەكونوميكالىق، ءبىرتۇتاس مادەني- رۋحاني كەڭىستىك بايلانىستىراتىنىن اتاپ ءوتتى.

ءوز كەزەگىندە گۋبەرناتوردىڭ ورىنباسارى - استراحان وبلىسى ۇكىمەتىنىڭ ءتوراعاسى ولەگ كنيازيەۆ ەكى ەلدى جاقىن، وداقتاس، دوستىق قارىم- قاتىناستار بىرىكتىرەتىنىن اتاپ ءوتتى. «مادەنيەت سالاسىنداعى ارىپتەستىك تاتۋ كورشىلىك قارىم- قاتىناستى قۇرۋدا ەرەكشە ورىن الاتىنىنا شىن جۇرەكتەن قۋانىشتىمىن»، - دەدى ول.

كورەرمەندەر قۇرمانعازى اتىنداعى حالىق اسپاپتار وركەسترىنىڭ، دومبىرا شەبەرلەرى سەكەن تۇرىسبەكوۆ، باتىرجان مىقتىبايەۆ پەن ايگۇل ۇلكەنبايەۆانىڭ، «استانا وپەرا» تەاترىنىڭ جەتەكشى ءسوليسى سالتانات احمەتوۆانىڭ جانە ەلىمىزگە تانىمال باسقا دا ارتىستەر مەن شىعارماشىلىق ۇجىمداردىڭ ونەرىن زور ىقىلاسپەن قارسى الدى.

ايتا كەتەيىك، اتالعان شاراعا دەيىن استراحان وبلىسى ۆولودار اۋدانى التىنجار اۋىلىنداعى قۇرمانعازى اتىنداعى وڭىرلىك مادەني ورتالىعىنىڭ اشىق الاڭىندا قازاق دياسپوراسى وكىلدەرىنە ارنالعان قازاقستان ونەر شەبەرلەرىنىڭ كونسەرتى ءوتتى.

قازاقستاننىڭ رەسەيدەگى مادەنيەت كۇندەرىنىڭ باعدارلاماسى 8-قىركۇيەكتە قازاندا جانە 13-قىركۇيەكتە ماسكەۋدە جالعاسادى.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى