الەم كۇتكەن جەكپە-جەك - كۇزدىڭ باستى سپورت دودالارى
جاڭاشا وتەتىن دەۆيس كۋبوگى
قىركۇيەكتە تەننيستەن دەۆيس كۋبوگى باستاۋ الادى. بۇل جولى جاڭا ەرەجەمەن وتەدى. ەندى 16 كوماندا ءتورت توپقا ءبولىنىپ وينايدى. قازاقستان قۇراماسى D توبىنا ءتۇستى. ويىندارىن 14-18- قىركۇيەك اراسىندا ۇلى بريتانيانىڭ گلازگو قالاسىندا وتكىزەدى. وندا قازاقستاننان بولەك، ا ق ش، ۇلى بريتانيا مەن نيدەرلاندى قۇرامالارى بولادى.
ءار توپتان ۇزدىك ەكى كوماندا شيرەك فينالعا جولداما الادى. شيرەك فينالدان باستاپ شەشۋشى ماتچتار قاراشانىڭ سوڭىندا مالاگادا وتەدى. دەۆيس كۋبوگىنىڭ بيىلعى يەگەرى 27- قاراشادا انىقتالادى.
الەم كۇتكەن جەكپە-جەك
ال بارشا قازاقستاندىق كۇتىپ جۇرگەن سپورت ءىس-شاراسى 17- قىركۇيەكتە بولادى. قازاقستاندىق گەننادي گولوۆكين مەكسيكالىق ساۋل الۆارەسپەن ءۇشىنشى رەت جۇدىرىقتاسادى. ارينە، ءبىز ادەتتەگىدەي بۇل كەزدەسۋدى جەكسەنبىدە، 18- قىركۇيەكتە تاڭەرتەڭ كورەمىز.
بوكسشىلاردىڭ العاشقى كەزدەسۋىندە تەڭ ەسەپ تىركەلىپ، سوندا بۇكىل الەم «تورەشىلەر گولوۆكيننىڭ جەڭىسىن ۇرلاپ كەتتى» دەسكەن ەدى. ال ەكىنشى كەزدەسۋدە كانەلو تورەشىلەر شەشىمىمەن جەڭگەن.
ەندى ءۇشىنشى جەكپە-جەكتە بوكسشىلار مەكسيكالىقتىڭ ەكىنشى ورتا سالماقتا ابسوليۋت الەم چەمپيونى اتاعىن ساراپقا سالادى. بۇل كەزدەسۋ دە لاس-ۆەگاستاعى T- Mobile ارەناسىندا وتەدى.
قازاقستاندىق فۋتبولشىلار ەرلىك جاساي الا ما؟
فۋتبولدان قازاقستان قۇراماسى بيىلعى ۇلتتار ليگاسىندا وتە ءساتتى ونەر كورسەتىپ جاتىر. سونىڭ شەشۋشى ماتچتارى دا جاقىندادى. قازاقستاندىقتار 22- قىركۇيەكتە ءوز الاڭىندا بەلارۋس قۇراماسىن قابىلدايدى. ال 25- قىركۇيەكتە ازەربايجان فۋتبولشىلارىنا قوناققا بارادى.
قازاقستان قۇراماسى وسى ەكى ويىننىڭ بىرەۋىندە جەڭىسكە جەتسە، 4-توپتا ءبىرىنشى ورىن الىپ، B ديۆيزيونىنا كوتەرىلەدى. سونىمەن بىرگە، C ديۆيزيونىنداعى باسقا ءۇش توپتىڭ جەڭىمپازىمەن ەۋروپا چەمپيوناتىنا بەرىلەتىن جولدامانى ساراپقا سالادى.
قازاقستاندىق فۋتبولشىلار بيىل ماتچتەردە جەڭىلىپ كورمەگەن. تەك ناۋرىزدا مولدوۆادان نەگىزگى ۋاقىتتا جەڭىلسە دە، پەنالتي سەرياسىندا باسىم تۇسكەن ەدى.
ۆولەيبولشىلار ءوز كورسەتكىشىن جاڭارتا الا ما؟
23 - قىركۇيەك پەن 15 - قازان اراسىندا نيدەرلاندى مەن پولشا ۆولەيبولدان ايەلدەر اراسىنداعى الەم چەمپيوناتىن قابىلدايدى. ءتورت جىل سايىن وتەتىن بۇل الەمدىك دوداعا قازاقستان قۇراماسى دا قاتىسادى. ارينە، قازاقستاندىقتار - تۋرنيردەگى اۋتسايدەرلەردىڭ ءبىرى. 2018-جىلى ءبىزدىڭ قۇراما 5 كەزدەسۋدىڭ بارىندە دە جەڭىلىپ قالعان.
ال ۇزدىك ناتيجەسىن 2014-جىلى كورسەتكەن، وندا 15-ورىن العان بولاتىن. بيىل ءبىزدىڭ ۆولەيبولشى قىزدار C توبىنا ءتۇستى، وندا ا ق ش، سەربيا، گەرمانيا، بولگاريا جانە كانادا قۇرامالارى بار. ءار توپتان ۇزدىك ءتورت كوماندا كەلەسى كەزەڭگە جولداما الادى. قازاقستان قۇراماسى العاشقى ماتچىن 24 - قىركۇيەكتە ا ق ش- قا قارسى وتكىزەدى.
تاريحي الەم چەمپيوناتى
بۇل الەم چەمپيوناتىنىڭ ەرەكشەلىگى كوپ. بۇل - فۋتبولدان اراب ەلىندە وتەتىن العاشقى، ازيا قۇرلىعىندا وتەتىن ەكىنشى الەم چەمپيوناتى. سونىمەن قاتار، بۇل - مامىر، ماۋسىم نە شىلدەدە وتپەيتىن العاشقى الەم چەمپيوناتى. كاتاردا جازدا كۇن اپتاپ بولۋىنا بايلانىستى الەمدىك دودا كۇز سوڭىنا شەگەرىلگەن ەدى. ەندى الەم چەمپيوناتى 20 - قاراشا مەن 18 - جەلتوقسان اراسىندا وتەدى.
ودان بولەك، كاتارداعى دودا 32 كوماندا قاتىساتىن سوڭعى الەم چەمپيوناتى بولادى. سەبەبى 2026-جىلعى بىرىنشىلىككە 48 كوماندا قاتىسادى دەپ جوسپارلانىپ وتىر.
وكىنىشكە قاراي، كاتارداعى الەم چەمپيوناتىنا قازاقستان فۋتبولشىلارى قاتىسپايدى.
ايتا كەتەيىك، كۇزدە بوكستان الەم چەمپيوندارى جانىبەك ءالىمحان ۇلى مەن دانيار ەلەۋسىنوۆ تە رينگكە ورالۋى مۇمكىن.
ءبىراق ولاردىڭ كەزدەسۋى تۋرالى رەسمي اقپارات جوق.
