الماتىدا جىل باسىنان بەرى قانشا ءسابي دۇنيەگە كەلدى
الماتى قالالىق ادىلەت دەپارتامەنتى باسشىسىنىڭ ورىنباسارى زاۋرەش ساتحوجينانىڭ ايتۋىنشا، 2022-جىلى مەگاپوليستە ءبىر جىل بۇرىنعى كورسەتكىشپەن سالىستىرعاندا 4877 ءسابي ارتىق دۇنيەگە كەلدى.
«بيىل وتكەن جىلمەن سالىستىرعاندا تۋۋ تۋرالى تىركەۋ ايتارلىقتاي ءوستى. جىل باسىنان بەرى الماتىدا 48200 بالا دۇنيەگە كەلسە، بىلتىر تۋعان سابيلەر سانى - 43323»، - دەدى وڭىرلىك كوممۋنيكاتسيالار قىزمەتىندە وتكەن بريفينگتە زاۋرەش ساتحوجينا.
تۇركسىب اۋدانى اكىمى اپپاراتىنىڭ ازاماتتىق حال اكتىلەرىن تىركەۋ ءبولىمىنىڭ باسشىسى جاننا ديۋسەمبايەۆا جاڭا تۋعان نارەستەلەر اراسىندا ەرەكشە ەسىمدەر كەزدەسەتىنىن اتاپ ءوتتى.
«وتە ەرەكشە ەسىمدەردىڭ ءبىرى - ۆيرساۆيا. بۇل سالادا قىزمەت ەتىپ جاتقانىما 30 جىل بولدى. وسى ۋاقىت ىشىندە مۇنداي ەسىمدى العاش رەت كەزدەستىردىم. ماعان قىزىق بولدى، سوندىقتان اتالعان ەسىم تۋرالى اقپاراتتى عالامتوردان ىزدەدىم. ول پاتشايىمنىڭ اتى بولىپ شىقتى. سول وتباسىندا ەكىنشى بالانىڭ ەسىمىن ۆيلاۆي قويدى. بۇل دا پاتشا دەگەندى بىلدىرەدى ەكەن. قازىر يسلامدا تىركەلگەن ەسىمدەر دە كوبەيىپ كەلەدى. بۇل دا ترەندتەردىڭ ءبىرى. كوپ وتباسى بالالارىنىڭ اتىن ادام دەپ قويا باستادى»، - دەيدى ول.
