كومىردىڭ قورى قاجەتتى مولشەردە جيناقتالدى - يندۋستريا ءمينيسترى
بۇل تۋرالى ۇكىمەت وتىرىسىندا يندۋستريا جانە ينفراقۇرىلىمدىق دامۋ ءمينيسترى قايىربەك وسكەنبايەۆ ايتتى، دەپ حابارلايدى قازاقپارات ءتىلشىسى.
«الداعى جىلۋ بەرۋ ماۋسىمىنا اۆتونومدى قازاندىقتارعا وتىن قاجەتتىلىگى 1,3 ميلليون تونناعا جۋىق كومىر مەن 16 مىڭ توننا مازۋتتى قۇرايدى. بۇگىنگى تاڭدا 1 ميلليون توننا كومىر (%81) جانە 14 مىڭ توننا مازۋت (%88) دايىندالدى. كومىر ساتىپ الۋدىڭ تومەن كورسەتكىشى الماتى، پاۆلودار جانە قاراعاندى وبلىستارىندا بايقالسا، ال مازۋت وتىنىن ساتىپ الۋدىڭ تومەن دەڭگەيى اقمولا، اقتوبە وبلىستارىندا بايقالىپ وتىر. جەرگىلىكتى اتقارۋشى ورگاندار اۆتونومدى قازاندىقتار ءۇشىن وتىندى ۋاقتىلى ساتىپ الۋ جانە جەتكىزۋ جونىندە شۇعىل شارالار قابىلداۋى قاجەت»، - دەدى ق. وسكەنبايەۆ.
سونىمەن قاتار ول مينيسترلىك اپتا سايىن حالىقتى جانە كوممۋنالدىق-تۇرمىستىق سەكتوردى كومىرمەن قامتاماسىز ەتۋ بويىنشا مونيتورينگ جۇرگىزىپ جاتقانىن ايتتى.
«كومىر ءوندىرۋشى كومپانيالاردىڭ دەرەكتەرى بويىنشا 2022-جىلعى قاڭتار-شىلدە ايلارىندا 66,4 ميلليون توننا كومىر (كومىر كونتسەنتراتىن قوسپاعاندا) ءوندىرىلدى. بۇل بىلتىرعى ءتيىستى كەزەڭمەن سالىستىرعاندا 106 پايىزدى قۇرادى (2021-جىلدىڭ 7 اي ءۇشىن 62,8 ميلليون توننا)»، - دەدى ۆەدومستۆو باسشىسى.
مينيسترلىك مالىمەتى بويىنشا ەسەپتى كەزەڭدە ەلدىڭ ىشكى نارىعىنا وسى كولەمدەگى كومىر جونەلتىلدى:
- كوممۋنالدىق-تۇرمىستىق قاجەتتىلىكتەرگە جانە حالىققا شامامەن 4,5 ميلليون توننا؛
- ەنەرگيا ءوندىرۋشى كاسىپورىندارعا 35 ميلليون توننا؛
- ونەركاسىپ كاسىپورىندارىنا 4,2 ميلليون توننا؛
- ەكسپورتقا 19 ميلليون توننا.
«ءىرى كومىر ءوندىرۋشى كومپانيالارى بولىنىسىندە «شۇباركول كومىر» (ۇلەسى %10,5)، «ۆوستوچنىي» (ۇلەسى %14,8)، «مايكوبە-ۆەست» (ۇلەسى %3,9) جانە «قاراجىرا» (ۇلەسى %7,3) رازرەزدەرىندە ءوندىرۋدىڭ ءوسۋى بايقالىپ وتىر. جالپى، بارلىق وڭىرلەردە كومىردىڭ قورى قاجەتتى مولشەردە جيناقتالعان. تەمىرجول كولىگى پاركى كومىردى تاسىمالداۋدى تولىق قامتاماسىز ەتىپ جاتىر»، - دەدى مينيستر.
ونىڭ سوزىنشە، رازەزدەردە كومىر تولىق مولشەردە بار، كومىردى ءوندىرۋ جوسپارلى تۇردە جۇرگىزىلىپ جاتىر، رازەزدەردەگى كومىردىڭ باعاسى وتكەن جىلعى دەڭگەيدە قالىپ وتىر.
