ەلىمىزدىڭ جوعارى ساياسي باسقارۋ جۇيەسى تولىقتاي جاڭارتىلادى - ساياساتتانۋشى
وسىعان وراي ساياساتتانۋشى، م. وتەمىسوۆ اتىنداعى باتىس قازاقستان ۋنيۆەرسيتەتىنىڭ اعا وقىتۋشىسى تۇرار شايحيەۆ ءوز وي- تولعامدارىمەن ءبولىستى، دەپ حابارلايدى قازاقپارات ءتىلشىسى.
ونىڭ ايتۋىنشا، جولداۋداعى ەڭ باستى ساياسي جاڭالىق، بۇل - مەملەكەت باسشىسىنىڭ ەلىمىزدىڭ ساياسي جۇيەسىنىڭ تۇراقتىلىعىن ساقتاۋمەن قاتار، جاڭا گەوساياسي تاۋەكەلدەر مەن ىشكى ساياسي سۇرانىستارعا جەدەل ءارى ءتيىمدى جاۋاپ بەرۋ ماقساتىندا وسى جىلدىڭ كۇزىندە پرەزيدەنت سايلاۋىن وتكىزۋ تۋرالى جوعارى دەڭگەيدەگى ساياسي شەشىم قابىلداۋى.
- قازىرگى الەمدە ساياسي وزگەرىستەر كوز ىلەسپەس شاپشاڭدىقپەن ءوتىپ جاتىر. سىرتقى الەمدە نەمەسە ەل ىشىندە بولعان كەز- كەلگەن ساياسي وزگەرىستەر ولارعا جەدەل ءارى ءتيىمدى جاۋاپ بەرۋدى تالاپ ەتەدى. ولاي بولماعان جاعدايدا، بۇل ىشكى ساياسي تۇراقتىلىق پەن ەلدىڭ الەۋمەتتىك- ەكونوميكالىق دامۋىنا زيان تيگىزۋى مۇمكىن. سوندىقتان، پرەزيدەنتتىڭ ءوزى اتاپ وتكەندەي، كەلەسى جىلدىڭ ورتاسىنا دەيىن ەلىمىزدىڭ جوعارى ساياسي باسقارۋ جۇيەسى تولىقتاي جاڭارتىلۋى ءتيىس، - دەيدى ساياساتتانۋشى.
ونىڭ پايىمداۋىنشا، سول سەبەپتى وسى جىلى كۇزدە پرەزيدەنت سايلاۋى وتەتىن بولسا، كەلەسى جىلدىڭ كوكتەمىندە پارلامەنت ءماجىلىسى مەن بارلىق دەڭگەيلەردەگى ءماسليحاتتار سايلاۋى كەزەك كۇتەدى. سودان كەيىن عانا جاڭا ۇكىمەت قۇرامى جاساقتالادى. ارينە، پرەزيدەنت سايلاۋى وتكەن سوڭ، ۇكىمەت ءوز وكىلەتتىگىن توقتاتادى. سوندىقتان ۇكىمەتتىڭ جاڭا قۇرامى نەلىكتەن پارلامەنت ءماجىلىسى سايلاۋىنان كەيىن جاساقتالاتىندىعىنا دا پرەزيدەنت ءوز جولداۋىندا ناقتى جاۋاپ بەرىپ ءوتتى.
«بولاشاقتا ۇكىمەت قۇرامىندا پارلامەنت ءماجىلىسى سايلاۋىندا جەڭىسكە جەتكەن بارلىق ساياسي پارتيالار وكىلدەرىنىڭ دە بولۋى كوزدەلۋدە. الەمنىڭ بارلىق دامىعان دەموكراتيالىق ەلدەرىندە ۇكىمەت قۇرامى وسىلاي جاساقتالادى. قورىتا ايتقاندا، پرەزيدەنت جولداۋى دەموكراتيالىق ءارى ادىلەتتى «جاڭا قازاقستاننىڭ» اۋقىمدى ساياسي جوسپارى جانە ەلىمىزدەگى ساياسي رەفورمالاردىڭ جاڭا دەموكراتيالىق ليبەرالدى كەزەڭىنە جول اشقان ساياسي قۇجات بولدى»، دەپ تۇيىندەدى ويىن تۇرار تولەگەن ۇلى.
