ۇلتتىق قور تابىسى بالالاردىڭ ەسەپشوتىنا دوللارمەن اۋدارىلادى
«3 مىڭ دوللار - ول ورتاشا ەسەپپەن ايتىلعان قاراجات. وسى ماسەلەدە مەملەكەت باسشىسىنىڭ باسپا ءسوز حاتشىسى رۋسلان جەلدىباي ايتقان مالىمەتكە سىلتەمە جاساپ وتىرسىزدار. قازىرگى كەزدە بۇل كورسەتكىش قوسىمشا ەسەپتەلىپ جاتىر»، - دەدى ءا. قۋانتىروۆ ۇكىمەت وتىرىسىنان كەيىن تىلشىلەر ساۋالىنا جاۋاپ بەرە وتىرىپ.
ونىڭ ايتۋىنشا، بولىنەتىن قاراجات سوماسى 2024-جىلى بالانىڭ جاسىنا قاراي ەسەپتەلەدى.
«بۇل جۇيە 2024-جىلدان ىسكە قوسىلادى. وسى كەزدە اتالعان جۇيەدە بالا ءبىر نەمەسە ەكى جىل عانا (18 جاسقا تولعاندا) بولۋى مۇمكىن. بۇل تۇرعىدا ەسەپشوتقا اۋدارىلاتىن قاراجات سوماسى دا از بولادى»، - دەدى مينيستر.
سونىمەن قاتار ۆەدومستۆو باسشىسى قاراجات دوللارمەن ەسەپتەلەتىنىن ناقتىلادى.
بۇدان بۇرىن حابارلانعانداي، مەملەكەت باسشىسى ءوز جولداۋىندا ۇلتتىق قوردىڭ جىل سايىنعى ينۆەستيتسيالىق تابىسىنىڭ 50 پايىزىن بالالاردىڭ ارناۋلى جيناقتاۋشى ەسەپشوتىنا اۋدارۋدى ۇسىندى.
«قارجى ءار بالا 18 جاسقا تولعانعا دەيىن اۋدارىلىپ تۇرادى، ونى مەرزىمىنەن بۇرىن ەسەپشوتتان شىعارىپ الۋعا بولمايدى. جيناقتالعان قارجى بالالار كامەلەت جاسىنا تولعاننان كەيىن ولاردىڭ باسپانا نەمەسە ءبىلىم الۋىنا جۇمسالاتىن بولادى. بۇل قاراجات وسكەلەڭ ۇرپاقتىڭ ۇلكەن ومىرگە قادام باسۋىنا مۇمكىندىك بەرەدى. قور، شىن مانىندە، ۇلتتىق مارتەبەگە يە بولىپ، حالقىمىزدىڭ يگىلىگىنە قىزمەت ەتەدى. باستامانى مۇقيات ازىرلەۋ قاجەتتىگىن ەسكەرە وتىرىپ، جوبانى 2024-جىلعى 1- قاڭتاردان باستاپ ىسكە قوسۋدى تاپسىرامىن»، - دەدى قاسىم-جومارت توقايەۆ.
