مەملەكەت باسشىسى قوستاناي وبلىسىندا ءورت ءسوندىرۋ جۇمىسىنىڭ بارىسىمەن تانىستى
بۇل تۋرالى ءوزىنىڭ Facebook پاراقشاسىنا ق ر پرەزيدەنتىنىڭ باسپا ءسوز حاتشىسى رۋسلان جەلدىباي جازدى، دەپ حابارلايدى قازاقپارات.
باسپا ءسوز حاتشىسىنىڭ حابارلاۋىنشا، الدىمەن پرەزيدەنت اۋليەكول اۋدانىنداعى اۋماقتى تىكۇشاقپەن ارالاپ شىقتى. كەيىن شۇعىل ارەكەت ەتۋ شتابىنىڭ وتىرىسىن وتكىزدى. سول جەردە جاۋاپتى ۆەدومستۆو باسشىلارىنا ءورتتى جەدەل اۋىزدىقتاۋ بويىنشا ناقتى تاپسىرمالار بەردى.
جالپى، زارداپ شەككەن اۋماقتىڭ باسىم بولىگىندە ءورت ءسوندىرىلدى. ءتىلسىز جاۋمەن بەتپە- بەت كەلگەن حالىق قاۋىپسىز جەرگە كوشىرىلدى. پرەزيدەنت وسى ازاماتتارمەن كەزدەسكەندە بۇكىل شىعىندارى (مال- مۇلكى، ءۇي، جيھازى ت. ب. ) تولىق وتەلەتىنىن، الداعى 2-3 ايدا جاڭا ۇيلەر سالىناتىنىن ايتىپ، كوڭىلى كۇپتى وتىرعان جۇرتقا باسۋ ايتتى.
بۇدان بولەك، قاسىم-جومارت توقايەۆ ءورت سوندىرۋشىلەرمەن كەزدەستى. الاپات الاۋمەن كۇرەسكەن ساربازدارعا العىسىن ايتىپ، ولاردى ناگرادالارعا ۇسىنىپ، قارجىلاي سىيلىقاقىمەن ماراپاتتايتىنىن جەتكىزدى.
سونداي-اق مينيستر يلينگە ءورت سوندىرۋشىلەردىڭ الەۋمەتتىك جاعدايىن، باسپانا ماسەلەسىن، ساپالى كادر دايىنداۋ ءىسىن شەشۋ بويىنشا تاپسىرمالار بەردى. سەبەبى ءورت سوندىرۋشىلەردىڭ ءۇي، جالاقى سىندى جەكە ماسەلەلەرىنىڭ تولىق شەشىلمەۋى، كوكشەتاۋداعى ءورت سوندىرۋشىلەردى دايارلايتىن وقۋ ورنىندا قاراپايىم جاتاقحانا جوقتىعى بۇل سالاعا سىن ەكەنىن ايتتى.
ساپار سوڭىندا ەرىكتىلەرمەن دە جولىقتى. سىن ساتتە شەت قالماي، قول ۇشىن بەرگەن ازاماتتارعا «سىزدەر ناعىز پاتريوتسىزدار، سىزدەردى ماقتان تۇتامىن» دەپ العىسىن ايتتى.
«قاتەرلى قاۋىپ كەلگەندە زارداپ شەككەن ازاماتتارىمىزعا ەلىمىزدىڭ ءار ايماعىنان گۋمانيتارلىق، قارجىلاي كومەك كورسەتىپ جاتقان حالقىمىز ءوزىنىڭ بىرىلىگىن كورسەتە ءبىلدى»، - دەلىنگەن حابارلامادا.
