ورتتەن زارداپ شەككەن قوستانايلىقتار تەلەكوممۋنيكاتسيا اقىسىنان ءبىر جىلعا بوساتىلدى
بۇل تۋرالى اتالعان ۇيىمنىڭ باسقارما ءتوراعاسى قۋانىشبەك ەسەكەيەۆ ءمالىم ەتتى، دەپ حابارلايدى قازاقپارات ءتىلشىسى.
«زارداپ شەككەندەرگە مۇمكىندىگىنشە تەزىرەك قالىپتى ومىرگە ورالۋىنا كومەكتەسۋ ءۇشىن قولىمىزدان كەلگەننىڭ ءبارىن جاساۋعا دايىنبىز. وسىعان بايلانىستى كومپانيا باسشىلىعى بيىلعى جىلدىڭ سوڭىنا دەيىن بايلانىس قىزمەتتەرى ءۇشىن تولەمدەردى توقتاتا تۇرۋدى، ابونەنتتەردىڭ قارىزدارىن جانە قىزمەتتەردى ۋاقتىلى تولەمەگەنى ءۇشىن ءوسىمپۇلدى جويۋ تۋرالى شەشتى»، - دەدى «قازاقتەلەكوم» ا ق باسقارما ءتوراعاسى قۋانىشبەك ەسەكەيەۆ.
باسقارما ءتوراعاسى ناقتىلاپ وتكەندەي، اۋليەكول اۋدانىنا قاراستى وزەرنوە، لەسنوە جانە امانقاراعاي اۋىلدارى تۇرعىندارىنىڭ بەرەشەگى جابىلىپ، ءوسىم پۇلى الىنىپ تاستالادى.
سونىمەن قاتار بۇگىندە اتالعان كومپانيانىڭ ماماندارى ءۇش ەلدى مەكەندەگى بايلانىس جەلىلەرىن قالپىنا كەلتىرۋ جۇمىستارىن جۇرگىزۋدە. ءورت سالدارىنان امانقاراعاي مەن وزەرنوە اۋىلدارىنداعى بايلانىس جەلىسى ورناتىلعان 50 گە جۋىق اعاش باعانى جانىپ كەتكەن. مۇنىمەن قوسا، جالپى ۇزىندىعى 3 شاقىرىم بولاتىن كابەلدەر زاقىمدالعان.
