ءبارى جانىپ كەتكەن: امانقاراعاي اۋىلىنىڭ قازىرگى جاي-كۇيى قانداي؟
زارداپ شەككەن اۋىلدىڭ جاي-كۇيى Tengrinews.kz فوتو ءتىلشىسى تۇرار قازانعاپوۆتىڭ رەپورتاجىندا.
قوستاناي وبلىسىنداعى امانقاراعاي اۋىلى - ەڭ كوپ زارداپ شەككەن اۋىل. مۇندا 91 ءۇي ورتەنگەن. ولاردىڭ بارلىعى دەرلىك جانىپ كەتكەن. 4- قىركۇيەكتە كەشكە ءتۇتىن اۋليەكولدەن لاۆرەنتيەۆكاعا دەيىن جەتكەن.
ت ج م مالىمەتتەرى بويىنشا، قازىر بەس ۋچاسكەدە، ياعني امانقاراعاي، لەسنوە، وزەرنوە، باعانالى جانە كالينينو اۋىلدارىندا ءورت ءسوندىرۋ جۇمىستارى جۇرگىزىلىپ جاتىر. ال امانقاراعاي اۋىلىندا جاعداي قالپىنا كەلگەن.
اۋىلدا ءورت وشاقتارى جوق. دەگەنمەن ءالى دە ءتۇتىن بار. ءورت سوندىرۋشىلەر ولاردى باقىلاۋدا ۇستاپ، اۋىلدى ارالايدى، قايتا تەكسەرىپ، سوندىرەدى.
كەيبىر ۇيلەردەن ىرگەتاس پەن قابىرعا عانا قالعان. قيراعان ءۇيىندى اراسىندا قالپىنا كەلتىرۋگە كەلەتىن ەشتەڭە جوق.
امانقاراعاي اۋىلىنىڭ تۇرعىندارىنىڭ كوبى ەۆاكۋاتسيالانعان. الايدا كەيبىرەۋلەر ساقتالۋى مۇمكىن نارسەلەردى الۋعا جانە ارى قاراي جانىپ كەتپەۋى ءۇشىن قايتا كەلە باستاعان.
كەيبىرەۋلەردىڭ بارلىق مۇلكى جانىپ كەتكەن. گاراجداردىڭ بىرىندە بالالار ۆەلوسيپەدى، موتوسيكل، قۇرالدار ساقتالعان. بۇلاردى قالپىنا كەلتىرۋ مۇمكىن ەمەس. اۋىل تۇرعىندارى «اقشاعا تاپسىرۋ» ءۇشىن تىم بولماعاندا مەتال قالدىقتارىن ساقتاپ قالۋعا تىرىسىپ جاتىر.
بىرەۋدىڭ سارايى ورتەنگەن، ءبىراق ءورت ۇيگە دەيىن جەتپەگەن. كۋاگەرلەردىڭ ايتۋىنشا، ءورت سوندىرۋشىلەر كەلگەنگە دەيىن اۋىل تۇرعىندارى ءتىلسىز جاۋمەن وزدەرى كۇرەسكەن. حالىق كورشى ۇيلەردى قۇتقارىپ، ءورتتى مۇمكىندىگىنشە تەزىرەك ءسوندىرۋ ءۇشىن قۇم مەن سۋدى وزدەرى اكەلگەن. ءورت سوندىرۋشىلەر كەلگەننەن كەيىن ەر ادامدار ۇيلەرىن قۇتقارۋ ءۇشىن قالۋعا تىرىسقان.
قازىر زارداپ شەككەن اۋىل تۇرعىندارىنىڭ كوپشىلىگى ۋاقىتشا ورنالاستىرۋ پۋنكتتەرىندە. كەيبىرەۋلەرى تۋىستارىنا كەتكەن. قالعاندارعا تاماق بەرىلگەن، مەديتسينالىق كومەك كورسەتىلگەن.
تۇرعىنداردىڭ باسىم كوپشىلىگىنىڭ جاستىق شاعى وسى امانقاراعاي اۋىلىندا وتكەن. ۇلكەندەر جاعى مۇندا بۇكىل ءومىرىن وتكىزگەن.
قوستاناي وبلىسىنا گۋمانيتارلىق كومەك كەلىپ جاتىر.
ت ج م باسشىسى يۋري يلين مەملەكەت تاراپىنان ۇيلەردى تەزىرەك قالپىنا كەلتىرۋگە كومەك كورسەتىلەتىنىن ايتقان ەدى.
قازىر ارنايى كوميسسيا ءۇي يەلەرىنە كەلگەن شىعىن كولەمىن باعالاپ جاتىر.
ەسكە سالايىق، قوستاناي وبلىسىندا تابيعي ءورت شىققان ەدى. بىرنەشە اۋىلداعى 108 قۇرىلىس بۇلىنگەن. 1800 دەن اسا ادام ەۆاكۋاتسيالانعان. 10 ادام جاراقات العان، ونىڭ ىشىندە كۇيىك شالعاندار، ۋلانعاندار بار.
سونىمەن قاتار، 1935-جىلى تۋعان ەر ادام قازا بولدى. وڭىردە جەرگىلىكتى اۋقىمداعى ت ج رەجيمى جاريالانعان ەدى.
پرەزيدەنت قاسىم-جومارت توقايەۆ ازاماتتاردىڭ قاۋىپسىزدىگىن قامتاماسىز ەتۋدى جانە ءورت ءسوندىرۋ شارالارىنا باسىم نازار اۋدارۋدى تاپسىردى.
مەملەكەت باسشىسى ۇكىمەتكە توتەنشە جاعدايدىڭ سالدارىن جويۋ ءۇشىن قاجەت قاراجات ءبولۋ كەرەگىن ايتتى. سونداي-اق، پرەزيدەنت تابيعي ءورتتى ءسوندىرۋ جونىندەگى جۇمىستاردىڭ بارىسىمەن تانىسۋ ءۇشىن وڭىرگە ءوزى كەلدى.
پرەمەر-مينيستر ءاليحان سمايىلوۆ قوستاناي وبلىسىندا ءورت كەزىندە باسپاناسىنان ايىرىلعاندارعا جاڭا ۇيلەر سالىناتىنىن ايتتى.
ال قازاقستان حالقى اسسامبلەياسى زارداپ شەككەندەرگە كومەك رەتىندە قاراجات جينالا باستاعانىن جاريالادى.
سونىمەن قاتار، بىرنەشە كومپانيا مەن قوعامدىق ۇيىم وكىلدەرى ۇيلەرىنەن ايىرىلعان تۇرعىنداردى قولدايتىنىن مالىمدەدى.
