قوستاناي وبلىسىنىڭ تۇرعىندارى تەگىن بايلانىسپەن قامتاماسىز ەتىلدى - مينيسترلىك
« اتاپ ايتقاندا، Kcell/Activ, Beeline, altel/تەلە2 وپەراتورلارى تۇرعىندارعا تەگىن ۇيالى بايلانىس ترافيكتەرىن جولدادى. وسىلايشا ءوڭىر تۇرعىندارى جاقىندارىمەن ەش كەدەرگىسىز بايلانىس ورناتا الادى»، - دەلىنگەن مينيسترلىك حابارلاماسىندا.
بۇدان بولەك، Tele2/Altel وپەراتورى ورتتەردى سوندىرۋگە جۇمىلدىرىلعان شۇعىل قىزمەتتەر ءۇشىن ارنايى موبيلدى بازالىق ستانتسيا ورنالاستىردى.
«قوستاناي وبلىسىنىڭ تۇرعىندارىن ءورت اپاتى سالدارى جويىلعانشا ساپالى بايلانىسپەن قامتاماسىز ەتۋ ماسەلەسى ءبىزدىڭ ۆەدومستۆونىڭ تىكەلەي باقىلاۋىندا. ءبىز وتانداستارىمىزعا ءوز تاراپىمىزدان قولداۋ كورسەتۋ باعىتىندا ءتيىستى شارالاردى جۇزەگە اسىرامىز»، - دەدى ق ر سيفرلىق دامۋ، يننوۆاتسيالار جانە اەروعارىش ونەركاسىبى مينيسترلىگىنىڭ باسپا ءسوز قىزمەتىنەن.
ەسكە سالايىق، قوستاناي وبلىسىنىڭ اۋليەكول اۋدانىندا ورمان ءورتى 2- قىركۇيەك كۇنى باستالدى.
قوستاناي وبلىسىندا احمەت بايتۇرسىن ۇلىنىڭ 150 جىلدىق مەرەيتويىنا ورايلاستىرىلعان سالتاناتتى شارالار كەيىنگە شەگەرىلدى. ءىس-شارالارعا پرەزيدەنت قاسىم-جومارت توقايەۆ باراتىنى جوسپارلانعان ەدى.
مەملەكەت باسشىسى بۇگىن وڭىرگە جۇمىس ساپارىمەن باردى. ءورت بولعان ەلدى مەكەن تۇرعىندارىمەن كەزدەسكەن پرەزيدەنت زارداپ شەگۋشىلەرگە ۇكىمەت ەكى ايدا بۇرىنعىدان دا جاقسى ۇيلەر سالىپ بەرەتىنىن ايتتى. وڭىردەگى ءورتتى اۋىزدىقتاۋعا جۇزدەگەن تەحنيكا، مىڭداعان اداممەن بىرگە 7 بىردەي تىكۇشاق تارتىلدى.
