استانا اتاۋىن قايتارۋ ۇسىنىلدى
پارلامەنتتىڭ تومەنگى پالاتاسىنداعى «جاڭا قازاقستان» دەپۋتاتتىق توبىنىڭ مۇشەلەرى وسىنداي ۇسىنىس جاسادى. ولار باس قالانىڭ «استانا» اتاۋىن اتا زاڭعا ەنگىزۋ كەرەك دەپ ەسەپتەيدى. «جاڭا قازاقستان» دەپۋتاتتىق توبىنىڭ مۇشەلەرى پرەزيدەنتتى 7 جىلعا ءبىر مەرزىمگە سايلاۋ باستاماسىن دا قولدايتىندارىن جەتكىزدى. سونىمەن قاتار جاڭا تالاپتارعا سايكەس وسى جىلدىڭ كۇزىندە مەملەكەت باسشىسىنىڭ سايلاۋىن وتكىزۋدى قۇپتادى.
ەدىل جاڭبىرشين، ق ر پارلامەنتى ءماجىلىسىنىڭ دەپۋتاتى:
- بىرىنشىدەن، ءبىز قازاقستان رەسپۋبليكاسى پرەزيدەنتىن جەتى جىلعا ءبىر مەرزىمگە سايلاۋ باستاماسىن قولدايمىز. ەكىنشىدەن، كونستيتۋتسياعا وزگەرىستەردى قازىر ەنگىزىپ، پرەزيدەنت سايلاۋىن جاڭا تالاپتارعا سايكەس وسى جىلدىڭ كۇزىندە وتكىزۋ قاجەت دەپ سانايمىز. جالپى بۇل مەملەكەتتىك باسقارۋ جۇيەسىن جاڭعىرتىپ، ەلىمىزدى ورنىقتى دامىتۋعا جول اشاتىن ماڭىزدى قادام.
ۇشىنشىدەن، كونستيتۋتسيامىزعا وزگەرىس ەنگىزەتىن بولساق، وندا وسى مۇمكىندىكتى پايدالانا وتىرىپ، اتا زاڭعا تاعى ءبىر اسا ماڭىزدى ماسەلەنى ەنگىزۋ كەرەك. ول ەلوردانىڭ اتىن قايتا قايتارۋ. ادامنىڭ كوزى تىرىسىندە قالاعا ونىڭ ەسىمىن بەرگەن دۇرىس دەپ ەسەپتەمەيمىز جانە دە قالانىڭ جاڭا اتاۋىن حالىقتا قابىلدامادى. سوندىقتان تۇڭعىش پرەزيدەنتتىڭ ءوزى ۇسىنعان استانا اتاۋىن قايتا قالپىنا كەلتىرۋ تاريحي ادىلدىك بولار ەدى. بۇل تۇڭعىش پرەزيدەنتتىڭ باس قالامىزدىڭ قۇرىلىسىن سالدىرۋداعى ەڭبەگىن دە باعالاۋ جانە حالقىمىزدىڭ ۇسىنىس- پىكىرىن دە ەسكەرۋ.
www.24.kz
