قازاقستاندىق دويبىشى جەتىنشى رەت الەم چەمپيونى اتاندى

دويبىدان ب ق و قۇراماسىنىڭ اعا جاتتىقتىرۋشىسى دانيار جۇماگەلديەۆ ءمالىم ەتكەنىندەي، دۇنيەجۇزىلىك دوداعا الەمنىڭ 15 ەلىنەن 200 دەي دويبىشى قاتىسىپ، باق سىنادى.

چەمپيونات دويبىنىڭ راپيد، بليتس جانە كلاسسيكا تۇرلەرى بويىنشا وتكىزىلدى.

راپيدتەن قازاقستان قورجىنىنا ءۇش مەدال ءتۇستى. باتىس قازاقستاندىق التىناي ساماتوۆا 9 جاسقا دەيىنگىلەر اراسىندا الەم چەمپيونى اتاندى.

14 جاسقا دەيىنگىلەر اراسىندا تاعى ءبىر باتىس قازاقستاندىق ايبەك ەسەنعاليەۆ كۇمىس جۇلدەگە يە بولدى. 20 جاسقا دەيىنگىلەردەن تۇركىستان وبلىسىنىڭ وكىلى ەسبول ەرەنعايىپ قولانى ەنشىلەدى.

بليتستەن 27 جاسقا دەيىنگىلەر اراسىندا باتىس قازاقستاندىق التىناي جۇماگەلديەۆا ءوز سپورتتىق جولىندا جەتىنشى رەت الەم چەمپيونى بولدى.

ا. ساماتوۆا تاعى ءبىر التىن جۇلدەنى ەنشىلەسە، ورالدىق توعجان تاجىبەكوۆا 17 جاسقا دەيىنگىلەر اراسىندا ەكىنشى ورىنعا كوتەرىلدى.

كلاسسيكادان دا الدىنا جان سالماعان ا. ساماتوۆا ءوز جاس ەرەكشەلىگىنە سايكەس ابسوليۋتتى جەڭىمپاز اتاندى. ت. تاجىبەكوۆا كلاسسيكادان ۇزدىك شىعىپ، ءوز سپورتتىق جولىندا ءۇشىنشى التىنىنا قول جەتكىزدى. ال ا. ەسەنعاليەۆ كلاسسيكادان ۇزدىك ۇشتىككە ىلىكتى.

وسىلايشا، قازاقستان قۇراماسى 5 التىن، 2 كۇمىس، 2 قولا مەدالدى جەڭىپ الدى.

الەم بىرىنشىلىگى كەزىندە ەرلەر مەن ايەلدەر اراسىندا كوماندالىق الەم چەمپيوناتى دا ءوتتى. قۇرامىندا التىناي جۇماگەلديەۆا مەن توعجان تاجىبەكوۆا بار قازاقستان كومانداسى بليتس پەن كلاسسيكادان قولا مەدالعا يە بولدى.

ەسكە سالا كەتەيىك، بۇدان بۇرىن باتىس قازاقستاندىق قوس دويبىشىنىڭ الەم چەمپيونى اتانعانىن جازعان بولاتىنبىز.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى