ساپالى زاڭداردى ۋاقىتىلى قابىلداۋىمىز قاجەت - ماۋلەن اشىمبايەۆ
بۇل تۋرالى ق ر سەناتىنىڭ ءتوراعاسى ماۋلەن اشىمبايەۆ ايتتى، دەپ حابارلايدى قازاقپارات ءتىلشىسى.
«بۇگىن مەملەكەت باسشىسى قاسىم-جومارت توقايەۆ جاڭا پارلامەنتتىك ماۋسىمنىڭ كەزەكتى سەسسياسىن اشىپ، حالىققا جولداۋىن جاريالادى. جولداۋدا ەل دامۋىنىڭ باسىم باعىتتارى مەن الداعى ماقسات-مىندەتتەرى بەلگىلەنگەن. بيىلعى جولداۋ رەسپۋبليكالىق رەفەرەندۋمدا حالىقتىڭ قولداۋىنا يە بولعان كونستيتۋتسيالىق رەفورمالاردى ىسكە اسىرۋعا، سونداي-اق ەلىمىزدىڭ الەۋمەتتىك-ەكونوميكالىق دامۋىن قامتاماسىز ەتۋگە باعىتتالعان. ەكونوميكانى جۇيەلى تۇردە ءارتاراپتاندىرۋ، حالىقتىڭ ءال-اۋقاتىن ارتتىرۋ، ساياسي جۇيەنى ءارى قاراي رەفورمالاۋ باعىتتارىندا جاڭا باستامالار كوتەرىلدى»، - دەدى م. اشىمبايەۆ بۇگىنگى سەنات وتىرىسىندا.
سەنات ءتوراعاسى بۇل باستامالاردىڭ جاڭا قازاقستاندى قۇرۋعا ارنالعان ناقتى قادامدار ەكەنىن اتاپ ءوتتى.
«ەل مۇددەسى جولىندا ستراتەگيالىق شەشىمدەر دە قابىلدانۋدا. پارلامەنتكە دە ءبىرقاتار زاڭنامالىق مىندەتتەر جۇكتەلدى. كوتەرىلگەن ماسەلەلەردى ىسكە اسىرۋ ءۇشىن الداعى ۋاقىتتا اۋقىمدى جۇمىستار اتقارۋ قاجەت. سەنات بەلگىلەنگەن باسىمدىقتاردى زاڭنامالىق تۇرعىدان قامتاماسىز ەتۋ ءۇشىن كەشەندى جۇمىس جۇرگىزۋگە دايىن. بۇل ءبىزدىڭ باستى مىندەتىمىز. سول سەبەپتى ءبىز ساراپشىلار قاۋىمداستىعىمەن، قوعامدىق ينستيتۋتتارمەن جانە باسقا دا مۇددەلەس تاراپتارمەن بىرلەسىپ، بەلسەندى جۇمىس ىستەۋىمىز قاجەت. ماجىلىسپەن جانە ۇكىمەتپەن بىرگە ساپالى زاڭداردى ۋاقىتىلى قابىلداۋدى قامتاماسىز ەتۋىمىز كەرەك.
سونداي-اق سىزدەر پارلامەنتتىك كانيكۋل كەزىندە وڭىرلەرگە، شالعاي اۋىلدارعا بارىپ، حالىقپەن كەزدەستىڭىزدەر. سول كەزدەسۋلەردە كوتەرىلگەن ماسەلەلەر پالاتانىڭ وسى سەسسياداعى جۇمىسىندا جان-جاقتى ەسكەرىلۋى قاجەت. وزدەرىڭىز كورىپ وتىرعانداي، الدىمىزدا اۋقىمدى جۇمىستار تۇر. سەسسيا بارىسىندا ءبارىمىز بىرىگىپ، وسى باعىتتاردا ناتيجەلى جۇمىس ىستەيمىز دەپ سەنەمىن»، - دەدى ماۋلەن اشىمبايەۆ.
