ساياسات نۇربەك كونە تۇركى ءداۋىرىنىڭ ەسكەرتكىشتەرىن اشقان عالىمداردى ماراپاتتادى
ق ر عىلىم جانە جوعارى ءبىلىم مينيسترلىگىنىڭ باسپا ءسوز قىزمەتىنەن ءمالىم ەتكەندەي، موڭعوليانىڭ عىلىم اكادەمياسى تاريح جانە ارحەولوگيا ينستيتۋتىنىڭ ارحەولوگى ا. ەنحتورگە، تۇركولوگ عالىمدار ن. بازىلحان مەن ن. بوگەنبايەۆقا مينيسترلىكتىڭ «عىلىمدى دامىتۋعا سىڭىرگەن ەڭبەگى ءۇشىن» توسبەلگىسى تابىستالدى. سونداي-اق اتالعان عالىمدارعا جانە حالىقارالىق تۇركى اكادەمياسىنىڭ پرەزيدەنتى دارحان قىدىرالىگە ءمينيستردىڭ العىس حاتتارى بەرىلدى.
موڭعوليانىڭ نومگون وڭىرىندە جۇرگىزىلگەن عىلىمي ارحەولوگيالىق ەكسپەديتسيانىڭ ناتيجەلەرى 24-تامىز كۇنى جاريالانعان بولاتىن. ەكسپەديتسيانى حالىقارالىق تۇركى اكادەمياسى مەن موڭعوليا عىلىم اكادەمياسىنىڭ ارحەولوگيا ينستيتۋتى بىرلەسىپ جۇرگىزدى.
«نومگونداعى قازبا جۇمىستارىنىڭ بارىسىندا ورتالىق ازياداعى شىعىس تۇركىلەرىنىڭ قاعان- كنياز تيپىندەگى مەموريالدىق كەشەندەرىن ەرەكشەلەيتىن نەگىزگى ارحيتەكتۋرالىق كومپونەنتتەردەن تۇراتىن تۇركى ءداۋىرىنىڭ بۇرىن بەلگىسىز بولعان تاعى ءبىر ەسكەرتكىشى اشىلدى. كونە تۇركىلىك رۋنا جانە سوعدى تىلىندە قاشالعان جازۋى بار بىتىكتاستىڭ ءبىر بولىگى، تاسباقا تۇعىرى، انتروپومورفتى ءبادىز بولىگى (قاعاننىڭ جارتىلاي بەينەسى) جانە زوومورفتى مۇسىندەر (ارىستان مەن قوي مۇسىندەرى) جانە تاعى باسقاسى تابىلدى»، - دەلىنگەن مينيسترلىك مالىمەتىندە.
مينيستر ساياسات نۇربەك بۇل جاڭالىقتىڭ ماڭىزدىلىعىن اتاپ ءوتىپ، حالىقارالىق ەكسپەديتسيا مۇشەلەرىنە تۇركولوگياعا جانە الەمدىك عىلىمعا قوسقان ۇلەسى ءۇشىن العىس بىلدىرگەن.
