يمانتاۋ- شالقار كۋرورت ايماعىندا تۋريزم بىرنەشە باعىتتا دامىتىلادى

الايدا بۇل ايماقتا ءالى كۇنگە شەشىلمەگەن ماسەلە جەتكىلىكتى، دەپ حابارلايدى قازاقپارات ءتىلشىسى.

يمانتاۋ كۋرورت ايماعى سقو ايىرتاۋ اۋدانىندا ورنالاسقان.

ءوڭىردىڭ ءىنجۋ- مارجانى سانالاتىن دەمالىس ورنى تابيعاتىنىڭ ادەمىلىگى بويىنشا بۋرابايعا دەس بەرمەيدى. قاراعايلى- قايىڭدى نۋ ورمانى بار، بالىققا تولى ايدىن شالقار كولدىڭ جانىندا انادايدان مەنمۇندالاعان تاۋ تۇر.

س ق و كاسىپكەرلەر پالاتاسى باسپا ءسوز قىزمەتىنىڭ مالىمەتىنشە، جاقىندا يمانتاۋدا شاعىن جانە ورتا بيزنەستى دامىتۋ اۋماقتىق باعدارلامالارىن ازىرلەۋ اياسىندا جۇمىس توبى بولىپ، تۋريستىك ايماقتىڭ الەۋەتىمەن تانىستى.

«يمانتاۋ كولى كوكشەتاۋدان 90 ك م، نۇر- سۇلتان قالاسىنان 400 ك م قاشىقتىقتا ورنالاسقان. شالقار- يمانتاۋ كۋرورت ايماعى تۋريزم سالاسىن دامىتۋ مەملەكەتتىك باعدارلاماسىنىڭ الەۋەتى جوعارى توپ-10 دىعىنا كىرەدى. يمانتاۋ تۋريستەردىڭ قىزىعۋشىلىعىن تۋدىرىپ، جىلدان- جىلعا كەلۋشىلەر سانى ارتىپ كەلەدى. اكىمدىكتىڭ مالىمەتىنشە، تەك بىلتىر مۇندا 60 مىڭ ادام دەمالىپ كەتكەن. بۇل زەرەندى ايماعىنا كەلۋشىلەرگە قاراعاندا كوپ. ءبىراق مۇندا ءالى شەشىلمەگەن ماسەلەلەر بارشىلىق. سونىڭ ءبىرى - جول. قازىر ول جوندەلە باستادى. ءبىراق كەي جەرلەر قيىرشىق تاس توسەلگەن كۇيى جاتىر. ەكىنشىسى - كادر جەتىسپەۋشىلىگى. مۇندا تۋريزم بويىنشا مەنەدجەرلەرگە، اسپاز، داياشىلارعا جانە قىزمەت كورسەتەتىن باسقا دا سالا ماماندارىنا سۇرانىس جوعارى»، - دەيدى اگرو- اۋىل تۋريزم قاۋىمداستىعىنىڭ وكىلى، قوناق ۇيلەردىڭ باسقارۋشىسى يلنار گاليامشين.

كاسىپكەرلەردىڭ ايتۋىنشا، شالقار- يمانتاۋ كۋرورتتىق ايماعىنىڭ الەۋەتى جوعارى. مۇندا ەكو، اگرو- اۋىل، بالىق اۋلاۋ، سپورتتىق جانە ءتۋريزمنىڭ باسقا دا تۇرلەرىن دامىتۋعا بولادى.

«س ق و- دا جاز كوپ بولسا ەكى اي عانا، ال قىس شامامەن 6 ايعا سوزىلادى. سوندىقتان وڭىردە قىسقى تۋريزمگە باسىمدىق بەرگەن دۇرىس. تۋريستەر بىزگە قىستا بالىق اۋلاۋعا، شاڭعى جانە كونكي تەبۋگە نەمەسە قىستاعى اسەم تابيعاتتا دەمالىپ، مونشاعا جانە كولدەگى ويىققا شومىلۋعا كەلۋى كەرەك. بۇل ماقساتتا جۇمىس ىستەپ جاتىرمىز. قازىرگى ۋاقىتتا يمانتاۋدا دا، شالقاردا دا قىستا تۋريستەردى قابىلداۋعا دايىن قوناق ۇيلەر بار»، - دەيدى يلنار گاليامشين.

س ق و جەلكەندى قايىق سپورتى فەدەراتسياسىنىڭ باسشىسى جانات وماروۆتىڭ ايتۋىنشا، يمانتاۋدا ياحتا كلۋبى اشىلعان.

بۇل جەردە جاس تۋريستەر اپتالىق كۋرستان ءوتىپ، جەلكەندى قايىق سپورتىمەن اينالىسا الادى.

«بىزدە قازىر 7 جەلكەندى قايىق بار. بۇل جەردە بالالاردى قايىقپەن جۇزۋگە 7 جاستان باستاپ ۇيرەتە الامىز. يمانتاۋدا سپورتتىڭ بۇل ءتۇرىن دامىتۋعا جاعداي بار. ۇنەمى جەل سوعىپ تۇرادى. ال جەرگىلىكتى بالالار سۋدان مۇلدەم قورىقپايدى. مەكتەپتەردە جەلكەندى قايىق سپورتى سەكتسياسىن اشىپ، ءتۇرلى جارىستار وتكىزۋگە بولار ەدى. سپورتتىڭ بۇل ءتۇرىن بۇقارالىق ەتىپ، يمانتاۋدىڭ وزىندىك ەرەكشەلىگىنە اينالدىرۋعا بولادى. جوسپار كوپ، ءبىراق ونى ىسكە اسىرۋعا ءوز كۇشىمىز جەتكىلىكسىز، مەملەكەتتىڭ قولداۋى قاجەت»، - دەيدى جانات وماروۆ.

قازىر ايىرتاۋ اۋدانىندا ءتۋريزمنىڭ 44 نىسانى بار. ونىڭ 17 ءسى يمانتاۋ كولىنىڭ جاعالاۋىندا ورنالاسقان.

بۇعان دەيىن يمانتاۋ اۋىلى تۇرعىندارى گۇل بيزنەسىن دامىتىپ، پەتۋنيا وسىرەتىن جىلىجايلاردىڭ 150 دەن اسقانىن ايتقان ەدىك.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى