تۇركى داۋىرىنە جاتاتىن قۇتلىق قاعاننىڭ كەشەنى تابىلدى
حالىقارالىق تۇركى اكادەمياسىنىڭ پرەزيدەنتى (TWESCO) دارحان قىدىرالى ءمالىم ەتتى، دەپ حابارلايدى قازاقپارات ءتىلشىسى.
«بۇگىنگى ۇلكەن جاڭالىق - بىلگە قاعان مەن كۇلتەگىننىڭ اكەسى II تۇرىك قاعاناتىن قايتا تىرىلتكەن قۇتلىق قاعاننىڭ كەشەنى تابىلدى. بۇل - بارشا تۇركى الەمى جانە كوشپەلى جۇرت ءۇشىن ماڭىزدى وقيعا. اتالعان جاڭالىققا تۇركى حالىقتارى بىرلەسە اتقارعان جۇيەلى جۇمىستىڭ ناتيجەسىندە جەتىپ وتىرمىز. بۇل جۇمىس جالعاسىن تابادى. سەبەبى ءبىز ءبىر عانا كەشەندى اشىپ وتىرمىز، وسىنداي ءالى 9 كەشەن بار. ياعني ءبىراز جىلعا جەتەتىن جۇمىس بار. II تۇركى قاعاناتىنىڭ نەگىزىن قالاعان قۇتلىق ەلتەرىس قاعاننىڭ كەشەنى مەن جازۋى تابىلۋىن تۇركى حالقىنىڭ العاشقى پاسپورتى دەۋگە بولادى»، - دەدى دارحان قىدىرالى ورتالىق كوممۋنيكاتسيالار قىزمەتى الاڭىندا وتكەن باسپا ءسوز ءماسليحاتىندا.
ونىڭ ايتۋىنشا، اتالعان تاريحي قۇندى جادىگەر ەكسپەديتسيا ناتيجەسىندە تابىلىپ وتىر.
«بۇعان دەيىن تۇركى الەمىنە قاتىستى جادىگەرلەردى ەۋروپالىقتار تاۋىپ كەلگەن، ءبىرىنشى رەت تۇركى حالقىنىڭ ءوز ۇرپاقتارى جاريا ەتىپ وتىر. تابىلعان جادىگەرلەرگە قاتىستى باسپا ءسوز ءماسليحاتىن اۋەلى موڭعوليادان وتكىزدىك، سودان سوڭ قازاقستاندا وتكىزىپ وتىرمىز»، - دەيدى ول.
