كوكشەتاۋداعى ريم-كاتوليك شىركەۋى جايلى نە بىلەمىز

بۇل تۋرالى قازاقپارات تىلشىسىنە اتالمىش عيباداتحانانىڭ ءدىني قىزمەتشىسى ۆويچەح سكورۋپا ايتىپ بەردى.

ۆويچەح سكورۋپانىڭ ايتۋىنشا، ونىڭ ءوزى ءبىر جىل بۇرىن كوكشەتاۋعا پولشادان كەلگەن.

«كوستەل» ءسوزىنىڭ قايدان شىققانىن بىلمەيمىن، ءبىز ءوزىمىزدى ريم-كاتوليك شىركەۋى دەپ اتايمىز. وسى جەردىڭ قامقورشىسى - انتوني پادۋانسكي. ءبىزدىڭ پريحودتىڭ قۇرىلىسى 1995-جىلى باستالدى. قاۋىمداستىق قۇرىلدى. مۇندا ادامدار دۇعا ارقىلى قۇدايمەن بايلانىسىپ، ءلاززات الادى»، - دەيدى ءدىني قىزمەتشى.

ريم-كاتوليك پريحودى كوكشەتاۋداعى ەڭ ادەمى نىسانداردىڭ ءبىرى سانالادى جانە وزگە عيماراتتاردان گوتيكا ستيلىمەن ەرەكشەلەنەدى. كەز كەلگەن كاتوليك شىركەۋىندەگىدەي، ونىڭ ورتاسىندا ءبىر جانە ەكى جاعىندا ەكى قۇرباندىق وشاعى بار.

«بىرەۋىندە فاتيمسكايا قۇداي اناسىنىڭ ءمۇسىنى تۇر. ونى 2001-جىلى قازاقستانعا كەلگەن ريم پاپاسى يوانن پاۆەل II قاستەرلەگەن ەدى. وڭ جاقتا قاسيەتتى سىيلار ورنالاسقان - بۇل ەڭ ماڭىزدى ورىن. ارينە، وزدەرىڭىز كورىپ وتىرعانداي، بۇل جەردە كيىز ءۇيدىڭ بەينەسى بار، ول ءبىز تاماشا ەل - قازاقستاندا تۇراتىنىمىزدى بىلدىرەدى»، - دەپ تولىقتىردى ۆويچەح سكورۋپا.

كاتوليكتەر عانا ءدىني قىزمەت كورسەتۋ كەزىندە ورگاندى قولدانادى.

شىركەۋدىڭ ءدىني قىزمەتشىسىنىڭ ايتۋىنشا، بۇل ورگان 1948-جىلى جاسالعان. كەيىن پوزنان قالاسىنداعى (پولشا) سەنت-ستانيسلاۆ كوستكانىڭ پريحودىنا تارتۋ ەتىلدى. ال 1999-جىلى كوكشەتاۋعا جەتكىزىلىپ، وسىندا ورناتىلدى. دەگەنمەن، ونى عيباداتحانادا تەك قۇدايعا قۇلشىلىق كەزىندە عانا قولدانبايدى. 2000-جىلى وسىندا ي. س. باحتىڭ مۋزىكا فەستيۆالى دە وتكەن ەكەن.

«ءبىزدىڭ ورگانيستىمىز - موناح ايەل. ول قىزمەت كەزىندە وسى ورگاندا وينايدى. ءبىزدىڭ ورگان - وتە ەسكى، ءبىراق دىبىسى كەرەمەت ەستىلەدى. ارينە، ەسكى بولعاندىقتان جوندەۋدى قاجەت ەتەدى»، - دەدى ۆويچەح سكورۋپا.

حرامدا ەكران ورنالاسقان. وندا ورىندالىپ جاتقان اندەردىڭ ءسوزى كورسەتىلەدى. ءدىني راسىمدەر كەستە بويىنشا وتكىزىلەدى. ارينە، پريحودشىلار ءۇشىن بەلگىلى ءبىر ەرەجەلەر بار.

«بۇل قۇدايدىڭ عيباداتحاناسى، قاسيەتتى ورىن. سوندىقتان مۇندا كەلگەندە كيىم ۇلگىسىنە ەرەكشە ءمان بەرىلەدى. بۇل نەگىزگى ەرەجە»، - دەدى ۆويچەح سكورۋپا.

سونىمەن بىرگە، ول تاۋەلسىز قازاقستاندا ءدىني ەركىندىك بارىن اتاپ ءوتتى.

«ءبىز تاماشا ەل - قازاقستاندا تۇرىپ جاتىرمىز. ءبىزدىڭ ەلدە ءدىني ەركىندىك بار، كەز كەلگەن ادام ءوز تاڭداۋى بويىنشا مەشىتكە نەمەسە شىركەۋگە بارا الادى. مەن ءوزىم مەشىتتە دە، پراۆوسلاۆ شىركەۋىندە دە بولىپ كوردىم. ءبىز عيباداتحاناعا كەلگەن ادامدى بالا نەمەسە ەرەسەك دەپ بولمەيمىز. ياعني، دۇعا ەتكىسى كەلگەن ادامعا بارلىق مۇمكىندىك بار»، - دەپ قوستى ءدىني قىزمەتشى.

وسى رەتتە، «نەلىكتەن ءوزى شىركەۋگە كەلدى؟» دەگەن ساۋالعا ۆويچەح سكورۋپا بىلاي جاۋاپ بەردى: «بۇل مەنىڭ تاڭداۋىم. بىرەۋ وتباسىن قۇرۋدى شەشەدى، ال مەن ءدىني قىزمەتشى بولۋدى جانە ادامدارعا قىزمەت ەتۋدى تاڭدادىم. ءار ادامنىڭ ومىرىندە تاڭداۋ جاسايتىن ءسات بولادى، سول كەزدە ول ءوزى قاي جولمەن جۇرەتىنىن تاڭدايدى...».

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى