الەمدەگى «ەڭ جالعىز ادام» قايتىس بولدى
ونىڭ تايپالاستارى وسىدان ونداعان جىل بۇرىن ولتىرىلگەن ەدى. وسى جىلدار بويى ابوريگەن بۇكىل الەمنەن وقشاۋلانىپ، جالعىز ءومىر ءسۇردى، - دەپ حابارلايدى Daily Mail.
باسىلىم مالىمەتىنشە، 1970-جىلداردان باستاپ، جايىلىمدىق جەرلەردىڭ يەلەرى جەرگىلىكتى حالىقتىڭ جەرىن باسىپ الۋ ءۇشىن ابوريگەندەرگە شابۋىل جاساعان، سول كەزدەردە تايپالار جوعالا باستاعان. سالدارىنان بۇكىل تايپادان ءبىر ادام عانا امان قالعان، ول تۋرالى 1996 -جىلدان بەرى بەلگىلى.
ول سىرتقى الەممەن، جالپى ادامدارمەن بايلانىسقا شىقپاعانى، ولاردان قاشقانى، اكەلگەن سىيلىقتارىنان باس تارتقانى اتاپ وتىلەدى. بىردە ول FUNAI (ۇلتتىق ءۇندى قورى) مۇشەسىن ساداقپەن ولتىرە جازداعان. جەبە ونىڭ وكپەسىنە تيگەن، ءبىراق جابىرلەنۋشى امان قالدى. سودان بەرى ولار ابوريگەنمەن بايلانىس ورناتۋ ارەكەتىن دوعارىپ، وعان 8070 گەكتار اۋماقتا تىنىش ءومىر سۇرۋگە مۇمكىندىك بەردى. ەر ادام ساداقپەن اڭ اۋلاپ، جەمىستەر، جابايى بال جيناپ، شاعىن باقشا وتىرعىزدى.
ءبارى ابوريگەندى «الەمدەگى ەڭ جالعىز ادام» دەپ اتاپ كەتكەن.
ابوريگەننىڭ دەنەسى وتكەن سەيسەنبىدە، 23-تامىزدا، سامان ءۇيىنىڭ الدىنداعى گاماكتان تابىلدى. پوليتسيا مالىمەتىنشە، ەر ادامنىڭ ءولىمى تابيعي سەبەپتەردەن بولۋى مۇمكىن. دەگەنمەن ناقتىراق مالىمەتتەر ساراپتامادان كەيىن بەلگىلى بولادى.
«بۇل ادامنىڭ اتىن ەشكىم بىلمەدى، ءتىپتى ونىڭ تايپاسى تۋرالى دا اقپارات جوقتىڭ قاسى، ونىڭ ولىمىمەن بۇكىل ءبىر تايپانىڭ گەنوتسيدى اياقتالدى. ويتكەنى بۇل، شىنىمەن دە، گەنوتسيد بولدى - جەر مەن بايلىققا اش بولعان شارۋالار بۇكىل ءبىر حالىقتى قاساقانا جويدى»، - دەدى زەرتتەۋشى جانە Survival International مۇددەلەردى قورعاۋ قىزمەتىنىڭ ديرەكتورى فيونا ۋوتسون.
1987 -جىلدان بەرى برازيليا ۇكىمەتى وقشاۋلانعان تايپالىق توپتارمەن بايلانىسۋعا ماجبۇرلەمەۋ ساياساتىن ۇستانادى. تايپاعا قاۋىپ ءتونىپ تۇرعاندا جانە بايلانىس ونىڭ امان قالۋىنىڭ جالعىز جولى بولىپ كورىنگەندە عانا ەل بيلىگى بايلانىسقا شىعادى.
جەرگىلىكتى حالىقتار مەن وقشاۋلانعان توپتاردىڭ قۇقىعىن قورعاۋعا ارنالعان FUNAI ۇيىمىنىڭ مالىمەتى بويىنشا، قازىر برازيليانىڭ امازونكاسىندا تولىق وقشاۋلانعان جانە الەممەن بايلانىس جاسامايتىن 113 تايپا بار. ولاردىڭ كەيبىرىندە ساناۋلى عانا ادام قالىپ، جويىلۋ الدىندا تۇر.
massaget.kz
