شاحماتتىڭ ءبىز بىلمەيتىن قۇپيالارى
بۇل ويىن ادامنىڭ ويلاۋ قابىلەتىن، تاكتيكاسىن جانە زياتكەرلىك قابىلەتىن دامىتاتىنىن ءبىرى بىلسە ءبىرى بىلمەس. شاحمات ادامنىڭ ويلاۋ قابىلەتىنە قولايلى سپورتتىق ويىننىڭ الەمگە كەڭ تاراعان ءتۇرى.
شاحمات ءسوزىنىڭ ماعىناسى پارسى تىلىنەن اۋدارعاندا پاتشا (شاح جانە مات) ءولدى دەگەن ماعىنانى بىلدىرەدى. شاحمات ويىن تاقتاسىنان تۇرادى. ويىن تاقتاسى 64 شارشىنى قۇرايدى. ويىننىڭ باسىندا ءاربىر ويىنشىنىڭ يەلىگىندە اق نەمەسە قارا ءتۇستى ون التى تاس (شاحمات فيگۋراسى) بولادى: ءبىر پاتشا، ءبىر ءۋازىر، ەكى ءپىل، ەكى ات، ەكى تۋرا جانە سەگىز پەشكا. ويىننىڭ ماقساتى - قارسىلاستىڭ تاستارىن شابۋىلداي وتىرىپ، پاتشاعا مات قويۋ. ەندەشە، ادامنىڭ جەكە تۇلعا رەتىندە قالىپتاسۋىنا مۇمكىندىك بەرەتىن شاحمات ويىنىنىڭ بىرنەشە سىرىن ەستە ساقتاپ جۇرگەنىڭىز ءجون بولار.
سەزىنۋ (ينتۋيتسيا)
ۋاقىت بىزدەن ءار نارسەنى ويلانىپ جاساۋدى تالاپ ەتەدى. تاڭ اتقاننان كەش باتقانشا ءبىز ءار ءتۇرلى ۇساق تۇيەك جۇمىستارعا جانە ماڭىزدى جۇمىستار شىعىپ قالىپ، ناقتى شەشىم قابىلدار كەزدە بىردەن تۇراقتى شەشىمگە كەلە الماي مەڭ-زەڭ بولىپ قالامىز. وسىنداي جاعدايدا شاحمات ويىنىنىڭ كومەگى كوپ. سەبەبى، ول ويلاۋ قابىلەتىن دامىتۋعا ءوز سەپتىگىن تيگىزەدى.
شىدام
ەگەر ءسىز شىدامسىز ادام بولساڭىز، وندا قارسىلاسىڭىزدى جەڭۋىڭىز ەكى تالاي. ويتكەنى، شاحمات شاپشاڭدىقتى جانە شىدامدىلىقتى تالاپ ەتەدى. شاحمات ويناعان ادام ءبىر ءتۇيىننىڭ شەشىمىن تابۋ ءۇشىن تەز ءارى دۇرىس شەشىم قابىلداي ءبىلۋ قاجەت. ال شاحمات ادامدى شىدامدىلىققا ۇيرەتەتىن بىردەن ءبىر قۇرال بولىپ تابىلادى. شىدامىن ۇستاي بىلگەن ادام تابىستى بولىپ كەلەدى.
اناليتيكالىق ويلاۋ
شاحمات ويىنىن ويناۋ بارىسىندا ادامنىڭ اناليتيكالىق ويلاۋ قابىلەتى قوسا داميدى. اناليتيكالىق ويلاۋ قابىلەتىنىڭ جوعارى بولۋى ادامنىڭ قانشالىقتى جۇيرىك ەكەنىن كورسەتەدى. ال مۇنداي جاعداي كوپ ادامدار دا كەزدەسە بەرمەيدى. ءسىزدىڭ جانىڭىزداعى ادامنىڭ لوگيكالىق ويلاۋ قابىلەتى جوعارى بولسا، وندا ءسىز اناليتيكالىق ويلاۋ قابىلەتىڭىز ارقىلى قارسىلاسىڭىزدى جەڭە الاسىز. اناليتيكالىق ويلاۋ قابىلەتى تەك ويىن دا عانا ەمەس، ومىرىڭىزگە دە ۇلكەن اسەرىن تيگىزەدى.
ويلاۋ قابىلەتىن باسقارا ءبىلۋ
ويلاۋ قابىلەتىن جەڭدىرە بىلگەن ادام ويىندا عانا ەمەس كەز-كەلگەن قىزمەتتە تابىستى بولىپ جەڭىسكە جەتە الادى. ال جەڭىسكە جەتۋ ءۇشىن ادام دۇرىس شەشىم قابىلداي ءبىلۋى ءتيىس. شاحمات ويىنى - جەڭىسكە جەتكىزۋگە باعىتتايتىن ويىننىڭ ءبىر ءتۇرى.
ويىنعا يكەمى
شاحمات ويىنىن ويناپ باستاماس بۇرىن وعان ادامنىڭ ىنتاسى جانە قابىلەتى بولۋى كەرەك. سىرت كوزگە بۇل ويىن وڭاي بولىپ كورىنۋ مۇمكىن. الايدا، شىدامدىلىقپەن العىرلىقتى تالاپ ەتەتىن بۇل ويىننىڭ شەشىمىن تابۋ ەكىنىڭ ءبىرىنىڭ قولىنان كەلمەس. سوندىقتان دا بۇل ويىندى ويناۋ ءۇشىن ادامنىڭ ەڭ الدىمەن، يكەمى بولۋ قاجەت. سونداي-اق، شاحمات ءسىزدى مىقتى تۇلعا بولىپ قالىپتاسۋىڭىزعا اسەر ەتەدى.
شاحمات- ول كۇرەس
شاحمات - ادامدى جىلدام ويلاۋعا، شەشىم قابىلداۋعا جانە قادام جاساۋعا يتەرمەلەيدى. ويناۋ لوگيكاسى زەيىندىلىكتى دامىتۋعا، ءار الۋان ۆاريانتتاردى جىلدام ءارى ءدال ەسەپتەي بىلۋگە، جەڭىسكە جەتۋگە دەگەن ەرىك-جىگەردى قالىپتاستىرۋعا جانە باسقا دا مورالدىق قاسيەتتەردى تاربيەلەۋگە كومەكتەسەدى.
لوگيكالىق ويلاۋ قابىلەتىنىڭ دامۋى
شاحمات ويىنى - بۇل ادامنىڭ مىنەز-قۇلقىن ءوزى باسقارۋمەن انىقتالاتىن قوعامدىق تاجىريبەنى قالىپتاستىرۋعا ارنالعان جاعدايلار نەگىزىندەگى ءىس-ارەكەتتىڭ ءبىر ءتۇرى. سوندىقتان، ادام بالاسىنىڭ دۇنيە تانىمى كەڭەيەدى، سوزدىك قورى، ويلاۋ قورى داميدى، ءبىلىم ساۋاتتىلىعى ماتەماتيكا، فيزيكا، حيميا سياقتى پاندەرگە كوپ سەپتىگىن تيگىزەدى.
