ەلوردادا قۇرمانعازى ەسكەرتكىشى الدىندا كۇي جارىسى ءوتتى
ونىڭ ماقساتى - حالقىمىزدىڭ ءتول ونەرى رەتىندە كۇيدى دارىپتەپ، ۇلى كۇيشىنىڭ ۇشان- تەڭىز مۇراسىن قايتا جاڭعىرتىپ، ۇرپاقتان ۇرپاققا تاراتىپ جانە ولاردى جاستار اراسىندا ناسيحاتتاۋ.
بۇل شارا قادىرمەندى قوناقتاردىڭ قۇرمانعازى ساعىرباي ۇلىنىڭ ەسكەرتكىشىنە گۇل شوقتارىن قويۋ راسىمىنەن باستالدى.
قوعام قايراتكەرى، «كۇي اناسى» رەسپۋبليكالىق قورىنىڭ جەتەكشىسى تولەگەن قۋانىشيەۆ ءسوز سويلەپ، 3 رەت «كۇي جارمەڭكەسى» وتكىزىلگەنىن جانە وسى كۇنگە دەيىن ارنايى شەبەرلەرگە 185 دومبىرا جاساتىپ، ەلىمىزدىڭ ءتۇرلى نىسانداعى ونەر مەكتەپتەرىنە تەگىن تاراتىلعانىن ايتتى.
ەندى ازاماتتاردىڭ جانە اقساقالدار القاسىنىڭ قولداۋىمەن «كۇي اتاسى» اتانعان داۋىلپاز كۇيشى- كومپوزيتور قۇرمانعازى بابامىزدىڭ ەسكەرتكىشى جانىندا 4- مارتە «كۇي جارمەڭكەسى» وتكىزىلگەلى تۇرعانىن حابارلادى.
قازاقستاننىڭ ەڭبەك سىڭىرگەن ونەر قايراتكەرى، كۇيلەردىڭ تاريحىن زەرتتەۋشى، پروفەسسور ايتجان توقتاعان ءوز سوزىندە قۇرمانعازىنىڭ مەكتەبى مەن شىعارماشىلىعى، سونداي- اق مادەني مۇراسىنىڭ ماڭىزدىلىعى تۋرالى ماعلۇمات بەردى.
بەلگىلى ونەر يەلەرى تۇرار الىپبايەۆ پەن انار مۇزداحانوۆا قۇرمانعازىنىڭ بىرنەشە كۇيىن ورىنداپ، كورەرمەننىڭ ىستىق ىقىلاسىنا بولەندى.
ق ر مادەنيەت قايراتكەرى، ديريجەر، كومپوزيتور نۇرلان بەكەنوۆ اسلان اسقار ۇلى اتتى جاس دارىن يەسىنە اق جول تىلەپ، دومبىرا سىيلادى. كۇيشى بابانىڭ ەكى كۇيىن تارتىپ، ولاردىڭ شىعۋ تاريحىن بايانداپ بەردى.
اقىن، سازگەر ءابدىعاني ءبازىلحان ۇلى ءوزىنىڭ جۇرەكجاردى ارناۋىن جەتكىزدى.
قازاق ۇلتتىق ونەر ۋنيۆەرسيتەتىنىڭ 4-كۋرس ستۋدەنتى تىلەۋلەس نۇرلىبەك حالىق اقىنى حاميت ەرعاليەۆتىڭ قۇرمانعازىعا ارنالعان پوەماسىنان ءۇزىندى وقىپ بەردى.
اقىن ايباتىر سەيتاق ءوز كەزەگىندە قۇرمانعازى ساعىرباي ۇلىنا ارنالعان «ۇلى دالانىڭ ءدۇلدۇلى» اتتى ولەڭىن وقىپ بەردى.
ادەتتەگىدەي كۇي سايىسى وتكىزىلدى. وعان كورەرمەن اراسىنان ۇمىتكەرلەر قاتىستى.
باق سىناعاندارعا قازىلىق جاساعاندار اتىنان قازاقستاننىڭ ەڭبەك سىڭىرگەن قايراتكەرى، پروفەسسور، كۇيشى ۇستاز ورىنباي دۇيسەن شىعارىلعان قورىتىندىنى جاريا ەتتى.
باس بايگەگە يە بولىپ، جەڭىمپاز اتانعان داۋلەت وڭعارعا ۇكىلى دومبىرا سىيعا تارتىلدى. وزگە جۇلدەگەرلەرگە كىتاپتار تابىس ەتىلدى.
وسى كۇي كەشىن نۇر- سۇلتان قالالىق قوعامدىق كەڭەسى، ەسىل اۋدانىنىڭ اكىمدىگى، قازاق ۇلتتىق ونەر ۋنيۆەرسيتەتى جانە «كۇي اناسى» رەسپۋبليكالىق قورى ۇيىمداستىردى.
