ديماش قۇدايبەرگەن جاڭا ءانىنىڭ مۋزىكالىق بەينەبايانىن ۇسىندى
ديماشتىڭ جاڭا ءانى جانكۇيەرلەرى ءۇشىن ۇلكەن توسىنسىي بولدى. ونىڭ باياۋ، رومانتيكالىق سارىنداعى ولەڭدەرىنە ۇيرەنىپ قالعان تىڭدارماندار بۇل جولى ىرعاقتى ءاندى ىقىلاسپەن قابىلدادى.
«ديماش، ونەرىڭ ورلەي بەرسىن، ءارقاشان بيىكتەن كورىنە بەر! الماتىدا وتەتىن جەكە كونتسەرتىڭە كەلەمىز»، «ديماش بالام، كەرەمەت! انا تىلىڭدەگى ءانىڭ 100 پايىزعا ۇنادى. ناعىز جاستاردىڭ بي كەشىنە ارنالعان ءان ەكەن»، «سەنىڭ قولىڭنان ءبارى كەلەدى، جانىم! تەك العا قويعان ماقساتىڭا جەتە بەر، التىنىم»، «ونەرىڭنەن، داۋىسىڭنان اينالدىم! وتە كەرەمەت»، «ۇنادى! اندەرىڭىزدى سونداي ءسۇيىپ تىڭدايمىن! امان بولىڭىز، ديماش اعا»، - دەپ جازعان جەلى قولدانۋشىلارى.
قازاق تىلىندەگى Zhalyn جارقىن ءارى ىرعاقتى ءانىن قازاقستاندىق كومپوزيتور ەدىلجان عابباسوۆ ديماش قۇدايبەرگەنمەن بىرلەسىپ جازعان. ەدىلجان وسى كومپوزيتسيانى جازۋعا ورىنداۋشىمەن تانىسۋ سەبەپ بولدى دەيدى.
«مەن Zhalyn-دى 2020 -جىلى ديماشپەن كەزدەسكەننەن كەيىن جازدىم. الدىمەن اۋەنىن جازدىم، كەيىن ءاننىڭ ءۇزىندىسىن ديماشقا كورسەتتىم، ول قايىرماسىن جازدى. بۇل كومپوزيتسيا ءبىزدىڭ شىعارماشىلىق تاندەمىمىزدە دۇنيەگە كەلدى. مەنىڭ ويىمشا، بارلىق تىڭدارمانعا بۇل تۋىندى ۇنايدى، ال ءبىز ولارعا باسقا دا ساپالى تۋىندىلار سىيلايمىز»، - دەدى ەدىلجان عابباسوۆ.
كومپوزيتسيا ءماتىنىن پروديۋسەر، تالانتتى اقىن نۇرجان اسحات ۇلى جازعان. نۇرجان ءان ماحاببات تۋرالى ەكەنىن ايتتى. الايدا ماحابباتتان باسقا بۇل اندە مىنەز دە بار دەيدى.
ديماش ءاندى Zhalyn دەپ اتاپ، ونىڭ قانداي بولۋ كەرەگىن ءتۇسىندىردى. نۇرجان اسحات ۇلى اۋەندى قايتا- قايتا تىڭداپ، ءاننىڭ ءماتىنىن جازعان.
«ءسىز ءوزىڭىزدى وزگەرتكىڭىز كەلسە، وندا ءوزىڭىزدى جوعالتاسىز. تابيعاتىڭىزدان باس تارتاسىز، مۇلدەم باسقا ادام بولاسىز. سوندىقتان ءبىز كەز كەلگەن ادامدى تۇسىنۋگە جانە قابىلداۋعا تىرىسۋىمىز كەرەك دەپ سانايمىن. بۇل - ءاننىڭ باستى يدەياسى»، - دەدى نۇرجان اسحات ۇلى.
بەينەباياندا ديماش پوپ- مۋزىكا كورولى مايكل دجەكسوننىڭ بي ەلەمەنتتەرىن قولدانعان. بۇل بەينەباياندى رەجيسسەر شىڭعىسحان تاجىكەيەۆ MOOD VIDEO جانرىندا تۇسىرگەن. ونىڭ ايتۋىنشا، بۇل جۇمىس ءوزى ءۇشىن دە، ورىنداۋشى ءۇشىن دە تاجىريبە بولعان.
ديماش قۇدايبەرگەن - ءانشى، كومپوزيتور جانە مۋلتي- اسپاپشى. ول I am Singer قىتاي بايقاۋىنان كەيىن كەڭىنەن تانىمال بولدى.
اقپارات دەرەككوزى: https://massaget.kz
