ەلتاڭبا اۆتورى مەن بەلگىلى حيرۋرگ قىزىلوردا وبلىسىنىڭ قۇرمەتتى ازاماتى اتاندى
جيىنعا قاتىسقان ايماق باسشىسى نۇرلىبەك نالىبايەۆ اتا زاڭدى ارداقتاۋ - بولاشاققا باتىل قادام باسقان ءاربىر ازاماتتىڭ اسىل پارىزى ەكەنىن جەتكىزىپ، بارشا سىر جۇرتىن كونستيتۋتسيا كۇنىمەن قۇتتىقتادى.
«كونستيتۋتسيا - قاعاز جۇزىندەگى قۇجات ەمەس، ول - ەلدىڭ، حالىقتىڭ، ءاربىر ازاماتتىڭ ءومىر ءسۇرۋ ەرەجەسى، مەملەكەتتىلىكتىڭ ىرگەسىن بەكىتىپ، حالىقارالىق كەڭىستىكتە ۇدايى وركەندەۋىن قامتاماسىز ەتەتىن نەگىز.
وسى جىلدىڭ ەلىمىزگە تۇبەگەيلى وزگەرىس اكەلگەنىن جاقسى بىلەسىزدەر. ەل پرەزيدەنتىنىڭ تاپسىرماسىمەن قازاقستان دامۋدىڭ جاڭا جولىنا ءتۇستى. ناۋرىز ايىندا مەملەكەت باسشىسى قاسىم- جومارت توقايەۆ ەل دامۋى ءۇشىن ءمانى زور ساياسي رەفورمالار جاريالادى. بۇل ءوز رەتىندە ەلدىڭ باستى زاڭى - كونستيتۋتسياعا ءبىرقاتار وزگەرىستەر اكەلۋدى تالاپ ەتەتىنى ءسوزسىز. وسىلايشا، بيىلعى 5 ماۋسىمدا رەسپۋبليكالىق رەفەرەندۋم وتكىزىلىپ، قازاقستان اتا زاڭىنىڭ 33 بابىنا 56 وزگەرتۋ ەنگىزىلدى»، - دەدى نۇرلىبەك نالىبايەۆ.
مەرەكەلىك جيىندا رامىزدەر مەرەكەسىنىڭ 30 جىلدىعى مەن مەرەيلى سەكسەن جاسى قاتار كەلگەن مەملەكەتتىك ەلتاڭبا اۆتورى جانداربەك مالىبەكوۆ پەن الپىس جاسقا جەتكەن بىلىكتى دارىگەر، 8000 عا جۋىق وتا جاساعان حيرۋرگ، قوعام قايراتكەرى بولاتبەك بايماحانوۆقا «قىزىلوردا وبلىسىنىڭ قۇرمەتتى ازاماتى» اتاعى تابىستالدى.
«تۋعان جەرىمە كەلىپ، حالىقتىڭ قۇرمەتىنە بولەنۋدەن ارتىق باقىت جوق. ەلىمىزگە ادال قىزمەت ەتۋىمىز كەرەك. بايقاعانىم، قىزىلوردانىڭ ءوڭى وزگەرىپ، كەلبەتى كەلىسىپ، جاڭا زامان تالابىنا ساي ءونىپ ءوسىپ جاتىر. مۇنىڭ ءبارى تۋعان جەرگە قىزمەت ەتەتىن ازاماتتاردىڭ ارقاسى. سىر ەلى ورلەي بەرسىن، مەرەكە قۇتتى بولسىن»، - دەدى جانداربەك مالىبەكوۆ.
سالتاناتتى ءىس- شاراعا جينالعان قاۋىم قاراپايىمدىلىقتى تۋ ەتكەن قوس ازاماتقا قۇرمەت كورسەتىپ، ىستىق ىقىلاسىن قوشەمەتپەن ءبىلدىردى.
سونداي- اق، ايماق دامۋىنا سۇبەلى ۇلەس قوسىپ، ايانباي ەتكەن ەتكەن ءبىرقاتار ازاماتتارعا قىزىلوردا وبلىسى اكىمدىگىنىڭ قۇرمەت گراموتاسى مەن العىس حات تابىستالدى.
ارنايى كەشتە ايماقتىڭ ونەر مايتالماندارى كوپشىلىككە مەرەكەلىك كوڭىل- كۇي سىيلادى.
