ۇماي ۇلتتىق سىيلىعىنا ءوتىنىم قابىلداۋ باستالدى
جۇلدە قورىنىڭ مولشەرى 54 ميلليون تەڭگەنى قۇرايدى، بارلىعى 4 باعىت بويىنشا 19 نوميناتسيا قاراستىرىلعان، دەپ حابارلايدى قازاقپارات مينيسترلىككە سىلتەمە جاساپ.
«ۇلىتاۋدىڭ قازاق حالقى ءۇشىن ەرەكشە قاستەرلى ءمانى بار. بۇل- ۇلت بەسىگى، ءبىزدىڭ كوپ عاسىرلىق تاريحىمىزدىڭ كوپتەگەن تاريحي ماڭىزدى وقيعالارىنىڭ كۋاسى. ۇلىتاۋدىڭ ماڭىزدى وقيعالار مەن جەتىستىكتەردىڭ ورتالىعىنا اينالعانى قۋانتادى. سوندىقتان، ءدال وسى جەردە ونەر ورداسى، ۇلت ۇياسى ۇلىتاۋ تورىندە، Umai ۇلتتىق سىيلىعىنىڭ باستالعانى تۋرالى حابارلاعىم كەلەدى»، - دەپ اتاپ ءوتتى داۋرەن ابايەۆ.
سىيلىق قازاقستاننىڭ شىعارماشىلىق ۇجىمدارى مەن جەكەلەگەن ورىنداۋشىلارىنا مىناداي نوميناتسيالار بويىنشا بەرىلەدى: تەاتر ونەرى؛ مۋزىكالىق- ورىنداۋشىلىق ونەر؛ حورەوگرافيا ونەرى؛ بەينەلەۋ جانە ساندىك- قولدانبالى ونەر.
«تەاتر ونەرى» باعىتى بويىنشا «وپەرا ونەرى» - «وپەراداعى ەرلەر پارتياسىن ۇزدىك ورىنداۋ» جانە «وپەراداعى ايەلدەر پارتياسىن ۇزدىك ورىنداۋ» سىيلىعىنىڭ جەڭىمپازدارى 2 ميلليون تەڭگەدەن الادى.
«اكتەرلىك شەبەرلىك» - 2 ميلليون تەڭگەدەن 2 سىيلىق - «ۇزدىك ەر ادام ءرولى» جانە «ۇزدىك ايەل ادام ءرولى».
سونداي-اق «ۇزدىك رەجيسسۋرا» جانە «سپەكتاكلدىڭ ۇزدىك كوركەم بەزەندىرىلۋى» نوميناتسيالارىنىڭ جەڭىمپازى 2 ميلليون تەڭگە الادى.
سونىمەن قاتار «ۇزدىك مۋزىكالىق- درامالىق سپەكتاكل» نوميناتسياسى بويىنشا جەڭىمپاز 10 ميلليون تەڭگە الادى.
كەلەسى باعىت - «مۋزىكالىق- ورىنداۋشىلىق ونەر» - 2 ميلليون تەڭگەدەن 3 اقشالاي سىيلىق - «ۇزدىك ءداستۇرلى ورىنداۋشى» (ءان ايتۋ)، «ۇزدىك ءداستۇرلى ورىنداۋشى» (ينسترۋمەنتاليست)، «ۇزدىك مۋزىكالىق انسامبل» (كلاسسيكالىق/حالىقتىق).
ءۇشىنشى باعىت - «حورەوگرافيالىق ونەر» - 5 اقشالاي سىيلىق. «ۇزدىك بي ۇجىمى» «بالەتتەگى ۇزدىك ورىنداۋشى» (2 سىيلىق) جانە «ۇزدىك حورەوگراف» 2 ميلليون تەڭگەدەن، ال «ۇزدىك بالەت سپەكتاكلى» 10 ميلليون تەڭگە الادى.
ءتورتىنشى باعىت - «بەينەلەۋ جانە ساندىك- قولدانبالى ونەر». جەڭىمپازدار «ساندىك- قولدانبالى ونەردىڭ ۇزدىك تۋىندىسى» ، «كەسكىندەمەشىنىڭ ۇزدىك جۇمىسى/گرافيكا»، «زاماناۋي ونەردەگى ۇزدىك جوبا» نوميناتسيالارى بويىنشا ماراپاتتالادى.
سىيلىق اياسىندا «ۇزدىك بالالار سپەكتاكلى ءۇشىن» ارنايى سىيلىعى تاعايىندالادى. جۇلدە 2 ميلليون تەڭگەنى قۇرايدى.
كونكۋرستىق ىرىكتەۋدى جۇرگىزۋ جانە سىيلىق لاۋرەاتتارىن ايقىنداۋ ءۇشىن ءتورت نوميناتسيانىڭ ءارقايسىسىندا 3 تاۋەلسىز ساراپشى بار، 12 ادامنان تۇراتىن ساراپتاما كوميسسيا جۇمىس ىستەيدى. وتىنىمدەر قازىردەن باستاپ 9-جەلتوقسانعا دەيىن قابىلدانادى.
