ازيا نارىعىندا سۇيىتىلعان تابيعي گازدىڭ قۇنى شارىقتادى
بۇعان دەيىن ازيا نارىعىندا كوگىلدىر وتىن وسىنشالىقتى قىمبات بولعان ەمەس. ازيادا گازدىڭ قىمباتتاۋىنا ەۋروپا نارىعىننان سۇرانىستىڭ كۇرت ارتۋى اسەر ەتتى. ونىڭ ۇستىنە كۇزدىڭ باستالۋىنا ون كۇن قالدى. ال ار جاعىندا قىلىشىن سۇيرەتىپ قىس كەلەدى. سوندىقتان بارلىعى جىلۋعا قاجەتتى قور قالىپتاستىرۋعا كىرىسىپ جاتىر.
ازيانىڭ شىعىسىنداعى جاپونيا جانە كورەيا نارىعىندا سۇيىتىلعان تابيعي گازدىڭ قازان ايىندا جەتكىزىلەتىن مىڭ تەكشە مەترى 59 دوللارعا دەيىن كوتەرىلدى. بلۋمبەرگ اگەنتتىگىنىڭ مالىمەتىنە قاراعاندا، قوس مەملەكەتتىڭ دە قويمالارى بوساۋعا جاقىن. ويتكەنى بيىلعى جاز ىستىق ءارى قۇرعاق بولدى. مۇزداتقىش، سالقىنداتقىشتارعا قاجەتتى ەنەرگيا ءوندىرۋ ءۇشىن كوپ گاز جاعىلدى. ەندى بۇل ەلدەر قىستىڭ قامىنا كىرىسپەك. قازىردىڭ وزىندە جاپوندىق، كورەيلىك جانە تايۆاندىق ءىرى گاز تاسىمالداۋشىلار ءونىمدى جەتكىزىپ بەرەتىن كومپانيا ىزدەپ الەك. ياعني نارىقتا گاز شىعارۋشىعا تالاس ءجۇرىپ جاتىر دەسە بولادى.
ال بۇعان دەيىن وسى ەلدەرگە گاز جەتكىزىپ كەلگەن اۆستراليا، ا ق ش ەلدەرى قازىر ەۋروپاعا اۋىپ كەتتى. ويتكەنى ولار ونىمگە جوعارى باعا ۇسىنىپ وتىر. ساراپشىلاردىڭ سالىستىرۋى بويىنشا ازيا نارىعىنان ەۋروپا نارىعى قازىر شامامەن 20 دوللارعا قىمبات. سوندىقتان الداعى ۋاقىتتا كەيبىر گاز وڭدەۋشىلەر ازيا ەلدەرىمەن كەلىسىمدى توقتاتىپ، كارى قۇرلىقپەن ءسوز بايلاسۋى مۇمكىن. ماسەلەن بيىل 4 ايدا ا ق ش ءوز گازىنىڭ 74 پروتسەنتىن كارى قۇرلىققا ساتتى. بىلتىرعى جىلدىڭ سايكەس كەزەڭىمەن سالىستىرعاندا ەكى ەسەدەي كوپ.
ر. جاقسىلىقوۆ: گازدى ءوزىمىز وڭدەيىك
گاز ماسەلەسى بىزدە دە بار. ىشكى نارىقتى كوگىلدىر وتىنمەن قامتۋ ءۇشىن كەيىنگى جىلدارى اۋقىمدى جوبالار قولعا الىندى. بىلتىر قاشاعان كەن ورنىندا 1 ميلليارد تەكشە مەتر گاز وڭدەيتىن زاۋىتتىڭ قۇرىلىسى باستالعان. جوبا جۇزەگە اسسا 2024 -جىلى مۇناي ءوندىرىسى تاۋلىگىنە 450 مىڭ باررەلگە دەيىن ارتادى. سونداي- اق ماڭعىستاۋدا گاز وڭدەۋ زاۋىتىن سالۋ جوسپارى بار. بۇعان قوسا ۇكىمەت تەڭىز شيەۆرويل كومپانياسىمەن كەلىسسوز جۇرگىزدى. كومپانيا ەكسپورتقا جىبەرىپ وتىرعان كوگىلدىر وتىننىڭ 2,6 ميلليارد تەكشە مەترىن ىشكى نارىققا بەرەتىن بولدى.
دەسە دە ماسەلە مۇنىمەن شەشىلمەيدى. ءوزىمىزدى گازبەن تولىق قامتۋ ءۇشىن قازاقستان جىلىنا 14-15 ميلليون تەكشە مەتر كوگىلدىر وتىن وندىرەتىن زاۋىت سالۋى قاجەت دەيدى ساراپشى.
راشيد جاقسىلىقوۆ، مۇناي سەرۆيستىك كومپانيالار وداعىنىڭ ءتورالقا ءتوراعاسى:
- قازاقستاننىڭ سۇرانىسى قازىرگى تاڭدا سۇيىق گازعا دەگەن 14 ميلليارد تەكشە مەتر. وسى ۋاقىتقا دەيىن ءبىزدىڭ قاراشىعاناقتى ءونىپ جاتقان گازىمىز رەسەيدە ءوندىرىلىپ جاتىر عوي. گاز جەردەن شىققان بويدا رەسەيگە كەتەدى. ورىنبوردا سوۆەت ۇكىمەتى سالعان ۇلكەن گاز وڭدەۋ زاۋىتى بار. سول جەردە بۋتان، پروپان شىعارادى دا ارى قاراي ساتادى. ءبىز تۋرا سونداي ۇلكەن ءوزىمىزدىڭ شەكارادا جىلىنا 14-15 ميلليارد تەكشە مەتر گازدى وڭدەۋ الاتىن زاۋىت سالۋ كەرەك.
www.24.kz
