اتىراۋدا جەڭىل كولىك قاققان موتوسيكل جۇرگىزۋشىسى اۋرۋحانادا كوز جۇمدى
. وقيعا اتىراۋ قالاسىندا 14-شىلدەدە جەرگىلىكتى ۋاقىتپەن ساعات 20:50 شاماسىندا بولعان.
بۇل دەرەكتى وبلىستىق پوليتسيا دەپارتامەنتىنىڭ باسپا ءسوز قىزمەتى راستادى. مۇنايلى شاھاردىڭ «اۆانگارد» شاعىن اۋدانىنداعى ل. ۆلاديميرسكي كوشەسىندە «Toyota Camry» كولىگى سولعا بۇرىلىس مانەۆرىن جاساۋ كەزىندە قاراما-قارسى كەلە جاتقان «Honda» موتوسيكلىنە جول بەرمەگەن. سونىڭ سالدارىنان جەڭىل كولىك پەن موتوسيكل سوقتىعىسقان. سوققىنىڭ ەكپىنىمەن موتوسيكل قارسى باعىتتاعى جولاقتا كەلە جاتقان «ۆاز-2114» كولىگىمەن تۇيىسكەن.
جول-كولىك وقيعاسىنىڭ سالدارىنان موتوسيكل رۋلىندە بولعان 1989 -جىلعى جۇرگىزۋشى ءارتۇرلى دەنە جاراقاتىن العان. زارداپ شەككەن جىگىت جەدەل جاردەم بريگاداسىنىڭ كولىگىمەن وبلىستىق اۋرۋحاناعا جەتكىزىلگەن.
«اۋرۋحانانىڭ جانساقتاۋ بولىمىنە تۇسكەن 33 جاستاعى ازامات كوز جۇمدى. قازىر پوليتسيا قىزمەتكەرلەرى جول-كولىك وقيعاسىنا بايلانىستى تەرگەۋ جۇرگىزىلۋدى باستادى»، - دەپ حابارلادى دەپارتامەنتتىڭ باسپا ءسوز قىزمەتى.
جەرگىلىكتى پوليتسيا قىزمەتى باسقارماسىنىڭ باستىعى، پوليتسيا پولكوۆنيگى ەرلان بيعامبايەۆتىڭ مالىمەتىنە سۇيەنسەك، جول-كولىك وقيعاسىنا ۇرىندىراتىن بىرنەشە سەبەپ بار. بىرىنشىدەن، مۇنى قارسى باعىتتاعى جولاققا شىعۋمەن بايلانىستىرۋعا بولادى. ەكىنشىدەن - جاياۋ جۇرگىنشىلەردى قاعۋ، ۇشىنشىدەن - جول قيىلىستارىنان ءوتۋ ەرەجەسىن بۇزۋ، تورتىنشىدەن - جىلدامدىقتى شامادان تىس اسىرۋ. بەسىنشىدەن - ماس كۇيدە رۋلگە وتىرۋ.
«اتىراۋ وبلىسىنىڭ اۋماعىندا 6 ايدا وسىنداي سەبەپتەردەن جول-كولىك وقيعاسى - 21,4، قازا بولعاندار – 60، دەنە جاراقاتىن العاندار سانى 11,8 پايىزعا ءوسىپ وتىر. وسى كەزەڭدە جول- كولىك وقيعاسىنان 40 ادام قازا تاۋىپ، 189 ادام ءارتۇرلى دەنە جاراقاتىن الدى. جىل باسىنان بەرى جىلدامدىقتى شامادان تىس اسىرعان 153 مىڭنان، قارسى باعىتقا شىققان 130-دان، جاياۋ جۇرگىنشىلەرگە جول بەرمەگەن 800-دەن، جاياۋ جۇرگىنشىلەرگە ارنالعان جولاقتان ءوتۋ كەزىندە 5 مىڭنان استام قۇقىق بۇزۋشىلىق دەرەگى انىقتالدى»، - دەپ ءمالىم ەتتى ەرلان بيعامبايەۆ.
ەسكە سالا كەتەلىك، بۇدان بۇرىن اتىراۋ وبلىسىندا التى ايدا جول اپاتىنان 40 ادام مەرت بولعانىن حابارلاعان ەدىك.
