ۇلتتىق بانك قازاقستاندىق بانكتەرگە ءرۋبلدى ءبىر رەت ەلدەن شىعارۋعا رۇقسات بەرەدى
بۇل تۋرالى بانك وكىلى ءاليا مولدابەكوۆا ءمالىم ەتتى، دەپ حابارلايدى قازاقپارات ءتىلشىسى.
«2022 -جىلدىڭ ناۋرىز ايىندا مەملەكەت باسشىسىنىڭ 10 مىڭ ا ق ش دوللارىنان اساتىن سوماداعى شەتەل ۆاليۋتاسىن ەلدەن شىعارۋدى شەكتەۋ جونىندەگى جارلىعى قابىلداندى. شارا قولما- قول شەتەل ۆاليۋتاسىنا الىپساتارلىق سۇرانىستىڭ قىسىمىن تومەندەتۋگە جانە شەتەل ۆاليۋتاسىن ەلدەن اكەتۋ تاۋەكەلدەرىن رەتكە كەلتىرۋگە مۇمكىندىك بەردى. وڭىردە ىشكى قارجى جۇيەسىنىڭ تۇراقتى جۇمىس ىستەۋىن قامتاماسىز ەتۋ ءۇشىن كورشى ەلدەر دە وسىنداي شارالار قابىلدادى»، - دەيدى ۇلتتىق بانك ءتوراعاسىنىڭ ورىنباسارى ءاليا مولدابەكوۆا .
سونىمەن قاتار، ول ەلدەن شەتەلدىك ۆاليۋتانى اكەتۋگە شەكتەۋلەر قويعاندىقتان رەسەيمەن ءوزارا ساۋدا بايلانىسى سالدارىنان قازاقستان بانكتەرىندە قولما- قول رۋبل جيناقتالىپ قالعانىن اتاپ ءوتتى.
«بۇعان، ەڭ الدىمەن، شەكارا ماڭىنداعى ساۋدانىڭ قوماقتى كولەمى، سونداي- اق ە ا ە و- عا قاتىسۋشى ەلدەر ازاماتتارىنىڭ وداق ىشىندە تۋريستىك جانە وزگە دە ماقساتتارمەن ەركىن ءجۇرۋى سياقتى فاكتورلار اسەر ەتتى. ۇلتتىق بانك ۇكىمەتپەن بىرلەسىپ جيناقتالعان رۋبلگە قاتىستى ماسەلەنى شەشۋ ءۇشىن جارلىققا تولىقتىرۋلار ەنگىزدى، وندا ەكىنشى دەڭگەيدەگى بانكتەر ءۇشىن قولما- قول ءرۋبلدى ءبىر رەت اكەتۋ مۇمكىندىگى كوزدەلگەن. ماسەلەن، ۇكىمەت قاۋلىسىنىڭ جوباسىندا 2022 -جىلعى 1-شىلدەدەگى جاعداي بويىنشا كاسسالاردا جيناقتالعان كولەم شەگىندە قولما- قول رەسەي ءرۋبلىن اكەتۋگە رۇقسات بەرۋ جوسپارلانعان. ونى قاۋلى كۇشىنە ەنگەن ساتتەن باستاپ 2022 -جىلعى 31-تامىزعا دەيىن جۇزەگە اسىرۋ قاجەت»، - دەدى بانك وكىلى.
الايدا، ول ءرۋبلدى ءبىر رەت اكەتۋ ارالىق شارا ەكەنىن تىلگە تيەك ەتتى.
«بۇل قازاقستان بانكتەرىندە رەسەيدىڭ قولما- قول ءرۋبلىنىڭ جيناقتالۋ پروبلەماسىن شەشپەيتىنىن تۇسىنەمىز. بانكتەردىڭ قولما- قول ءرۋبلدى اكەتۋگە تىيىم سالۋدى تولىعىمەن جويۋ ماسەلەسىن قاراۋ ساۋدا اعىندارىنا تالداۋ جۇرگىزۋگە جانە جاعدايدىڭ تۇراقتانۋىنا قاراي مۇمكىن بولماق»، - دەپ ءتۇسىندىردى ءاليا مولدابەكوۆا.
