تولاسسىز جاۋعان جاۋىن سالدارىنان جۇزدەگەن تۇرعىن ءۇي سۋ استىندا قالدى

100 دەن استام ادام ۋاقىتشا باسپاناعا كوشىرىلدى، دەپ حابارلايدى قازاقپارات مەنشىكتى ءتىلشىسى.

جەكسەنبى كۇنى قاتتى نوسەر سالدارىنان ىستانبۇلدىڭ ەۋروپالىق بولىگىندەگى بىرنەشە اۋداندا سۋ تاسقىنى بولدى.

سۋ مولشەرىنىڭ كوپ بولۋىنان ەسەنيۋرت جانە بەيكوز مۋنيتسيپاليتەتتەرىندەگى كوشەلەر مەن جولدار ۋاقىتشا جابىلدى، باسقا اۋدانداردا قوعامدىق كولىك قوزعالىسى بۇزىلدى.

پروۆينتسيا گۋبەرناتورى الي ەرليكايانىڭ ايتۋىنشا، تولاسسىز جاۋعان نوسەردەن 18 اۋداندا 134 تۇرعىن ءۇي، 12 شەبەرحانا، 3 فابريكا جانە ءبىر مەشىتتى سۋ باسقان. كۇنى بويى سۋ تاسقىنى تۋرالى 797 حابار تۇسكەن، ونىڭ 266 سى - ەسەنيۋرت اۋدانىندا.

سونداي-اق، بەيكوز اۋدانىندا شاتىرعا جاي ءتۇسىپ، بەس قاباتتى تۇرعىن ۇيدەن ءورت شىققان. ءورتتى جىلدام اۋىزدىقتاعان، ءبىراق ول كورشى ءۇيدى شارپىپ ۇلگەرگەن.

قۇرباندار مەن زارداپ شەككەندەر تۋرالى اقپارات ازىرگە جوق.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى