ءتورت وڭىردە پەداگوگ تاپشىلىعى بار - اسحات ايماعامبەتوۆ
بۇل تۋرالى وقۋ- اعارتۋ ءمينيسترى اسحات ايماعامبەتوۆ تۇركىستان وبلىسىنىڭ تۇرعىندارىمەن كەزدەسۋىندە ايتتى، دەپ حابارلايدى قازاقپارات ءتىلشىسى. مينيستر بيىل ءبىلىم سالاسىندا جاڭا جوبا جۇزەگە اساتىندىعىن ءمالىم ەتتى. رەسپۋبليكا كولەمىندە بىلىكتى، ءبىلىمدى پەداگوگتەر ىرىكتەلىپ، ءمۇعالىم تاپشىلىعى بار ايماقتارعا جىبەرىلەدى.
«جوبا العاشقىدا اتىراۋ، ماڭعىستاۋ، الماتى، تۇركىستان وبلىستارىندا وتەتىن بولادى. سەبەبى، ءبىلىم بەرۋ ساپاسىن كوتەرۋىمىز كەرەك»، - دەدى اسحات ايماعامبەتوۆ.
سونداي- اق، مينيستر بيىلدان باستاپ مۇعالىمدەردى جۇمىسقا قابىلداۋ جاڭا ەرەجەگە ساي جۇزەگە اساتىندىعىن جەتكىزدى جانە مەكتەپ ديرەكتورلارىن روتاتسيالاۋ ءىسى الداعى ۋاقىتتا جالعاساتىندىعىن ايتىپ ءوتتى.
«ەندى مۇعالىمدەردى جۇمىسقا قابىلداۋدى ديرەكتورلار شەشپەيدى. بۇل جۇمىس ۇمىتكەرلەردىڭ ناقتى جيناعان بالدارى بويىنشا، كونكۋرس ارقىلى، ساندىق جۇيەمەن ىسكە اسادى. رەسپۋبليكا بويىنشا 500 گە جۋىق ديرەكتور روتاتسيالاۋدان ءوتتى. مەنىڭ ويىمشا وتە قاجەتتى شارا. زاڭعا سايكەس روتاتسيا ينستيتۋتىن جالعاستىرامىز»، - دەدى ول.
بۇدان بۇرىن حابارلاعانىمىزداي، وقۋ- اعارتۋ ءمينيسترى اسحات ايماعامبەتوۆ تۇركىستان وبلىسىن ارالاپ ءجۇر.
