«مۇقاعالي» فيلمى قازاندا وتەتىن مۇسىلمان كينوسى فەستيۆالىنە قاتىسادى

تاتارستاندا وتەتىن قازان كينوفەستيۆالىنىڭ ىرىكتەۋ كوميسسياسى ءتوراعاسى نينا كوچەليايەۆانىڭ ايتۋىنشا، بيىل بايقاۋعا قاتىسۋعا بىرنەشە مەملەكەتتەن ءوتىنىم كەلىپ تۇسكەن.

ناتيجەسىندە نەگىزگى تولىقمەتراجدى فيلمدەر بايقاۋىنا 10 فيلم ىرىكتەلىپ الىندى، ونىڭ ىشىندە تۇركيا، قازاقستان، ءۇندىستان، يران، بانگلادەش، رەسەي، مىسىر، شري-لانكا مەملەكەتتەرىنىڭ تۋىندىلارى، سونداي-اق ەكى ەل بىرلەسىپ تۇسىرىلگەن 2 تۋىندى بار. جالپى بيىل 44 ەلدەن 625 ءوتىنىم تۇسكەن.

سونىمەن قاتار، قازان كينوفەستيۆالى شەڭبەرىنە ەكىنشى رەت كينو نارىق ۇيىمداستىرىلىپ، دارىندى كينوگەرلەرگە وزدەرىنىڭ جوبالارىن ىسكە اسىرۋعا مۇمكىندىك بەرەتىن حالىقارالىق پيتچينگ (سەناريلەر بايقاۋى) وتكىزىلەدى.

ايتا كەتەيىك، ق ر مادەنيەت جانە سپورت مينيسترلىگى تاپسىرىسى بويىنشا ش. ايمانوۆ اتىنداعى «قازاق فيلم» كينوستۋدياسى تۇسىرگەن كينوتۋىندى قازاقتىڭ اقيىق اقىنى مۇقاعالي ماقاتايەۆ ءومىرىنىڭ سوڭعى جىلدارى تۋرالى باياندايدى.

بۇعان دەيىن فيلم تالليندەگى «ا» ساناتىنداعى 25-حالىقارالىق «قاراڭعى تۇندەر» كينوفەستيۆالىندە كورسەتىلىپ، قازىلار القاسىنىڭ ارنايى جۇلدەسىنە يە بولعان.

بيىل ناۋرىز ايىندا اتالعان فيلم ءۇندىستانداعى حالىقارالىق كەرالا فەستيۆالى اياسىندا كورسەتىلگەن بولاتىن.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى