الەمدەگى ەڭ جاقسى جۇمىستان باس تارتقانىم ءۇشىن وكىنەمىن- بوريس دجونسون
ءتۇرلى دەڭگەيدەگى 50-گە جۋىق مەملەكەتتىك قىزمەتكەر ۇكىمەت باسشىسىنىڭ ساياساتىمەن كەلىسپەيتىنىن ايتىپ، جۇمىستان شىعۋ تۋرالى ارىز جازدى. بريتانياداعى قازىرگى ساياسي احۋال قالاي؟ ساراپشىلار نە دەپ جاتىر؟
- سوڭعى ۋاقىتتا باسى داۋ- دامايدان ارىلماعان ۇكىمەت باسشىسى اقىرى قىزمەتىنەن كەتەتىن بولدى. لوكداۋن كەزىندە دجونسون ارىپتەستەرىمەن بىرگە ساۋىق كەشتەرىنە قاتىسىپ، وزدەرى شىعارعان زاڭداردى وزدەرى بۇزعانى ءۇشىن ايىپتالعان بولاتىن. وعان قارسى سەنىمسىزدىك ۆوتۋمى جاريالانعانىمەن ايىپپۇلمەن عانا شەكتەلگەنى بەلگىلى. قاراماعىنداعى قىزمەتكەرى كريس پينچەرگە قاتىستى سوڭعى داۋ دجونسوننىڭ قىزمەتىنە نۇكتە قويعانداي.
پينچەر كونسەرۆاتيۆتى پارتيانىڭ جوعارى لاۋازىمدى قىزمەتىن اتقارىپ كەلدى. ول بىرنەشە رەت ارىپتەستەرىن جىنىستىق ارەكەتتەرگە ماجبۇرلەگەنى ءۇشىن ايىپتالعان. ءبىراق دجونسوننىڭ بۇعان كوز جۇما قاراعانى بىلاي تۇرسىن، قامقورلىق تانىتىپ، مانسابىن وسىرگەن. بۇدان كەيىن وپپوزيتسيا وكىلدەرى عانا ەمەس، پارتيالاستارى دا قارسى شىعىپ، ءتىپتى مينيسترلەر مەن قول استىنداعى قىزمەتكەرلەرى بىرىنەن سوڭ ءبىرى قىزمەتىنەن كەتتى. ناتيجەسىندە بوريس دجونسوننىڭ وتستاۆكا جاريالاۋدان باسقا امالى قالمادى.
بوريس دجونسون، ۇلى بريتانيا پرەمەر- ءمينيسترى:
- ۇزاق ۋاقىت شەشىم قابىلداۋىمنىڭ سەبەبى سايلاۋشىلاردىڭ ءۇمىتىن سوڭىنا دەيىن اقتاۋعا تىرىستىم. وزىمە جۇكتەلگەن مىندەتتەرىمدى جانە ۋادەلەرىمدى ورىنداۋ مەن ءۇشىن ماڭىزدى. مەن ءوزىمنىڭ جەتىستىكتەرىمەن، ونىڭ ىشىندە Brexit- ءتىڭ اياقتالۋىمەن، ۇلى بريتانياداعى پاندەميانى جەڭۋىممەن جانە باتىس ەلدەرى اراسىندا ۆلاديمير پۋتيننىڭ ۋكرايناعا باسىپ كىرۋىنە قارسى ارەكەتتەردە كوشباسشى بولعانىممەن ماقتانامىن. الەمدەگى ەڭ جاقسى جۇمىستان باس تارتقانىم ءۇشىن وكىنەمىن. جۇبايىم كەرريگە، بالالارىما، ۇلتتىق دەنساۋلىق ساقتاۋ قىزمەتىنە، قارۋلى كۇشتەر مەن داۋنينگ- ستريت قىزمەتكەرلەرىنە العىسىمدى بىلدىرەمىن.
داۋنينگ ستريتتەگى رەسمي دەرەككوزدەرگە سەنسەك، ۇكىمەت باسشىسى كۇزدە وتەتىن سايلاۋعا دەيىن قىزمەتىندە قالادى. كونسەرۆاتيۆتى پارتيا كوشباسشىلىعىنا تالاس جازدا ءوتىپ، جاڭادان سايلانعان پرەمەر- مينيستر قىزمەتىنە قازان ايىندا كىرىسپەك. ءبىراق دجونسوننىڭ كەيبىر پارتيالاستارى بۇل يدەياعا ءۇزىلدى- كەسىلدى قارسى. ولار ۇكىمەت باسشىسى مۇمكىندىگىنشە تەزىرەك كەتۋى كەرەك دەپ وتىر. دجونسوننىڭ ورنىنا ۇمىتكەرلەر قاتارىندا ءبىر- ەكى كۇن بۇرىن ءوز ەركىمەن قىزمەتىنەن كەتكەن بۇرىنعى قارجى ءمينيسترى ريشي سۋناك، دەنساۋلىق ساقتاۋ ءمينيسترى سادجيد دجاۆيد جانە باس پروكۋرور سۋەللا براۆەرمان بار. سايلاۋعا تۇسكىسى كەلەتىندەردىڭ قاتارىنىڭ ءالى دە تولىعاتىنى انىق.
www.24.kz
