ەلەنا رىباكينا العاش رەت ۋيمبلدون تۋرنيرىنىڭ فينالىنا شىقتى

قازاقستاندىق تەننيسشى جارتىلاي فينالدا الەمنىڭ بۇرىنعى ءبىرىنشى راكەتكاسى، «ۇلكەن دۋلىعا» تۋرنيرىنىڭ ەكى مارتە چەمپيونى (فرانسيا اشىق چەمپيوناتى - 2018б ، ۋيمبلدون - 2019)، قازىرگى كەزدە رەيتينگىدە 18-ساتىدا تۇرعان رۋمىنيالىق سيمونا حالەپپەن كەزدەستى.

قارسىلاستار وسىعان دەيىن ءوزارا ءۇش رەت ويناپ، سونىڭ ەكەۋىندە س. حالەپ جەڭىسكە جەتكەن ەدى. بۇل جولى ە. رىباكينا ءبىرىنشى پارتيانى قارقىندى باستاپ، 3:0 ەسەبىمەن العا شىقتى.

وسى باسىمدىلىعىنان ايىرىلعان جوق - 6:3. ەلەنا ەكىنشى سەتتە دە 2:0 ەسەبىمەن العا كەتكەنىمەن، سيمونا سول بويدا تارازى باسىن تەڭەستىرىپ ۇلگەردى - 2:2. دەگەنمەن، قازاقستاندىق سپورتشى قايتا برەيك جاساپ، ءوز گەيمىن الدى - 4:2.

سودان كەيىن ماتچتى تاعى ءبىر برەيكپەن ءتامامدادى - 6:3.

ءبىر ساعاتتان استام ۋاقىتقا سوزىلعان باسەكە بارىسىندا ەلەنا 5 ەيس جاساپ، 9 برەيك- پوينتتىڭ تورتەۋىن ءمۇلت جىبەرمەدى.

وسىلايشا، ە. رىباكينا قازاقستاندىق تەننيسشىلەر اراسىنان تۇڭعىش رەت ۋيمبلدون جارىسىنىڭ فينالىنا ءوتتى.

بۇل - تەڭدەسسىز تابىس. ەلەنا رىباكينا ۇلى بريتانيا اشىق چەمپيوناتىنىڭ فينالىندا الەمنىڭ 2-راكەتكاسى، تۋنيستىك ونس جابەرمەن باس جۇلدەنى ساراپقا سالادى.

و. جابەر جارتىلاي فينالدا الەمدىك رەيتينگىدە 103-ورىندا تۇرعان گەرمانيالىق تاتيانا ماريانى 6:2، 3:6، 6:1 ەسەبىمەن تىزە بۇكتىرگەن بولاتىن.

ەسكە سالا كەتەيىك، بۇدان بۇرىن ەلەنا رىباكينانىڭ تۇڭعىش رەت ۋيمبلدون تۋرنيرىنىڭ جارتىلاي فينالىنا وتكەنىن جازعانبىز.

سونداي-اق، ەلەنا رىباكينا ۋيمبلدوندا جارتىلاي فينالدىق كەزدەسۋىن وتكىزەتىنى حابارلاندى.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى